മനാമ: ഏഷ്യ വൺ മാഗസിൻറെ ഗ്ലോബൽ ഇന്ത്യൻ ഓഫ് ദി ഇയർ പുരസ്കാരത്തിന് പ്രമുഖ പ്രവാസി വ്യവസായി കെ.ജി. ബാബുരാജനെ തെരഞ്ഞെടുത്തു. എൻജിനീയറിങ് രംഗത്ത് നാലു ദശാബ്ദത്തോളം നീണ്ട അനുഭവസമ്പത്തുള്ള കെ.ജി. ബാബുരാജൻറെ വിവിധ മേഖലകളിലെ നേട്ടങ്ങൾ പരിഗണിച്ചാണ് 2020-21 വർഷത്തെ പുരസ്കാരത്തിന് തെരഞ്ഞെടുത്തത്.
എൻജിനീയറിങ് മേഖലയിലെ കമ്പനികൾക്കും സ്ഥാപനങ്ങൾക്കും അക്രഡിറ്റേഷൻ നൽകുന്ന അമേരിക്ക ആസ്ഥാനമായ ഇൻറർനാഷനൽ അക്രഡിറ്റേഷൻ സർവിസസിൽ അംഗമായ ഏക ഇന്ത്യക്കാരനാണ് ഇദ്ദേഹം. കേന്ദ്ര സർക്കാറിൻറെ ഈ വർഷത്തെ പ്രവാസി ഭാരതീയ സമ്മാൻ അവാർഡും ബി.കെ.ജി ഹോൾഡിങ് മാനേജിങ് ഡയറക്ടറായ കെ.ജി. ബാബുരാജനെ തേടി എത്തിയിരുന്നു. ബഹ്റൈൻറെ സാമൂഹിക, സാംസ്കാരിക, ജീവകാരുണ്യ രംഗങ്ങളിൽ തൻ്റെതായ സംഭാവനകൾ നൽകി വ്യക്തിമുദ്ര പതിപ്പിച്ച അദ്ദേഹത്തിന് അർഹതക്കുള്ള അംഗീകാരമായി ഗ്ലോബൽ ഇന്ത്യൻ ഓഫ് ദി ഇയർ പുരസ്കാരം.
