മനാമ: മുൻ വർഷങ്ങളിൽ ബഹ്‌റൈനിൽ വളരെ വിജയകരമായി നടത്തിവന്നിരുന്ന ഉപയോഗിച്ച പാഠപുസ്തക ശേഖരണവും വിതരണവും ഈ വർഷവും തുടരുമെന്ന് ഇൻഡക്സ് ബഹ്റൈൻ ഭാരവാഹികൾ അറിയിച്ചു. ബഹ്റൈൻ കേരളീയ സമാജവുമായി ചേർന്ന് ബഹ്‌റൈനിലെ മുഴുവൻ സാമൂഹ്യ സാംസ്കാരിക മത രാഷ്ട്രീയ സംഘടനകളുടെയും സഹകരണത്തോടെയായിരുന്നു മുൻ വര്ഷങ്ങളിലെ പുസ്തക ശേഖരണവും വിതരണവും നടന്നിരുന്നത്.
വിവിധ സംഘടനാ ആസ്ഥാനങ്ങളിൽ വെക്കുവാറുള്ള കളക്ഷൻ ബോസ്‌കുകളിൽ നിന്നും ലഭിക്കുന്ന പുസ്തകങ്ങൾ ബി കെ എസിൽ ശേഖരിച്ചു വെക്കുകയും സ്‌കൂൾ തുറക്കുന്നതിനു മുൻപുള്ള ഒരു ദിവസം രക്ഷിതാക്കളും കുട്ടികൾക്കും കൂട്ടമായി വന്ന് സമാജം ഹാളിൽ നിന്നും ആവശ്യാനുസരണം പുസ്തകങ്ങൾ ശേഖരിക്കുയായിരുന്നു പതിവ് രീതികൾ.
ടെക്സ്റ്റ് പുസ്തകങ്ങൾക്കൊപ്പം ആവശ്യമായ സ്റ്റേഷനറി സാധനങ്ങളും നോട്ട് പുസ്തകങ്ങളും സൗജന്യമായി നൽകി വരാറുണ്ട്. ഇപ്പോഴത്തെ പ്രതികൂല സാഹചര്യത്തിൽ പുസ്തകങ്ങൾ ശേഖരിക്കുവാനും അവ കൂട്ടമായി വിതരണം ചെയ്യുവാനും കഴിയാത്ത അവസ്ഥയുണ്ട്. എങ്കിലും പുസ്തകങ്ങൾ വിതരണം ചെയ്യുവാൻ ആഗ്രഹിക്കുന്നവർക്കും പുസ്തകങ്ങൾ ആവശ്യമുള്ളവർക്കും ആയി ഇന്ഡക്സ് ബഹ്റൈൻ കൊടുത്തിട്ടുള്ള ലിങ്കിലൂടെ പേരുകൾ രജിസ്റ്റർ ചെയ്യാവുന്നതാണ്.
പരസ്പരം പുസ്തകങ്ങൾ കൈമാറുവാനുള്ള സൗകര്യങ്ങളും ഉണ്ടായിരിക്കും. എല്ലാ ഏരിയകളിലുമുള്ള ഇന്ഡക്സ് ഭാരവാഹികൾ പുസ്തകങ്ങൾ ശേഖരിക്കുകയും ആവശ്യക്കാർക്ക് എത്തിച്ചു നൽകുകയും ചെയ്യുന്നതുമാണെന്നും പത്രക്കുറിപ്പിലൂടെ അറിയിച്ചു.
സ്‌കൂൾ അദ്ധ്യയന വർഷം ആരംഭിക്കുന്ന സമയങ്ങളിൽ പൊതുവെ രക്ഷിതാക്കൾക്ക് സാമ്പത്തികമായി വളരെ പ്രയാസങ്ങൾ ഉണ്ടാവാറുള്ള സമയങ്ങളാണ്. അത്തരം സാഹചര്യങ്ങളിൽ ഒരു കൈത്താങ്ങാവാം എന്ന ലക്ഷ്യമാണ് പ്രധാനമായും ഇന്ഡക്സ് മുന്നോട്ടു വെച്ചത്. മുൻ വര്ഷങ്ങളിലെന്ന പോലെ തന്നെ പുസ്തകങ്ങൾ സംഭാവന നൽകുവാനും ആവശ്യമായുള്ളവരുമായി നിരവധി രക്ഷിതാക്കളാണ് ഇതൊനോടകം തന്നെ ബന്ധപ്പെട്ടുകൊണ്ടിരിക്കുന്നതെന്നും ഭാരവാഹികൾ കൂട്ടിച്ചേർത്തു.
ലോകവ്യാപകമായി കോവിഡ് ബാധ പടരുന്ന നിലവിലെ സാഹചര്യത്തിൽ പല രക്ഷിതാക്കളുടെയും അവസ്ഥകൾ വിവരണാതീതമാണ്. അത്തരം സാഹചര്യങ്ങളിൽ പുസ്തകശേഖരണം നിർബന്ധമായും നടത്തേണ്ടതുണ്ട് എന്ന ബോധ്യമാണ് ഇത്തരത്തിൽ ഒരു പ്രവർത്തനവുമായി മുന്നോട്ടു വന്നിരിക്കുന്നതെന്ന് ഇന്ഡക്സ് ബഹ്റൈൻ പ്രതിനിധി റഫീക്ക് അബ്‌ദുല്ല പറഞ്ഞു.
കഴിഞ്ഞ വർഷങ്ങളിൽ സാമ്പത്തികമായി പ്രയാസം അനുഭവിക്കുന്ന വിദ്യാർത്ഥികൾക്ക് പുതിയ യൂണിമോഫുകളും നൽകി വന്നിരുന്നു. ഈ വർഷവും സ്‌കൂൾ ആരംഭിക്കുന്ന സമയത്ത് ആവശ്യമുള്ള കുട്ടികൾക്ക് യൂണിഫോമുകൾ നൽകുവാനുള്ള സൗകര്യങ്ങളും ഇൻഡക്സ് ഒരുക്കുന്നുണ്ട്.
പുസ്തകങ്ങൾ നൽകാൻ താല്പര്യമുള്ളവർക്കും ആവിശ്യക്കാർക്കും shorturl.at/qDEIW എന്ന ലിങ്ക് വഴിയോ indexbhn@gmail.com എന്ന ഇ മെയിൽ വഴിയോ പേരുകൾ രജിസ്റ്റർ ചെയ്യാവുന്നതാണ്. കൂടുതൽ വിവരങ്ങൾക്കായി ഇന്ഡക്സ് ഭാരവാഹികളായ സാനി പോൾ (39855197), റഫീക്ക് അബ്ദുള്ള (38384504), അജി ഭാസി (33170089), അനീഷ് വർഗ്ഗീസ് (39899300), ബാലകൃഷ്ണ പ്രസാദ് (36163772), ലത്തീഫ് ആയഞ്ചേരി (39605806), നവീൻ നമ്പ്യാർ (39257781) എന്നിവരുമായി ബന്ധപ്പെടാവുന്നതാണ്.
