മനാമ: കോവിഡ് പ്രതിസന്ധിയിൽ പെട്ട് ഏറെ നാൾ നീണ്ട കാത്തിരിപ്പിനൊടുവിൽ 177 പ്രവാസികൾ ഇന്ന് ജന്മനാട്ടിലേക്ക് യാത്ര തിരിക്കും. വന്ദേ ഭാരത് മിഷൻ്റെ ഭാഗമായി ഇന്ന് മെയ് 8 ന് വെള്ളിയാഴ്ച വൈകീട്ട് കൊച്ചിയിലേക്ക് പുറപ്പെടുന്ന എയർ ഇന്ത്യ എക്സ്പ്രസ് വിമാനത്തിൽ യാത്ര ചെയ്യാൻ തെരഞ്ഞെടുക്കപ്പെട്ടവർക്കുള്ള ടിക്കറ്റുകൾ മുഴുവൻ നൽകി കഴിഞ്ഞതായി ഇന്ത്യൻ എംബസി അധികൃതർ അറിയിച്ചിരുന്നു. ടിക്കറ്റ് ലഭിച്ചവർ എല്ലാവരും തന്നെ ഉച്ചക്ക് 12 മണിയോടെ വിമാനത്താവളത്തിലെത്തണമെന്നും അറിയിപ്പുണ്ട്. 177 മുതിർന്നവരും അഞ്ച് ശിശുക്കളുമാണ് ആ വിമാനത്തിലെ യാത്രക്കാർ. കോവിഡ് പ്രതിരോധവുമായി ബന്ധപ്പെട്ട മുൻകരുതലുകളോടെ സാമൂഹിക അകലം പാലിച്ചായിരിക്കും എമിഗ്രേഷൻ നടപടികൾ പൂർത്തികരിക്കുക.
ബഹ്റൈൻ പ്രാദേശിക സമയം വൈകിട്ട് 4.30നാണ് വിമാനം ബഹ്റൈൻ ഇൻറർനാഷണൽ എയർപോർട്ടിൽ നിന്ന് പറന്നുയരുക. ഇന്ത്യൻ സമയം രാത്രി 11.20 ഓടെ കൊച്ചിയിൽ എത്തും. രോഗികൾ, ജോലി നഷ്ടമായവർ, ഗർഭിണികൾ മുതലായ നാട്ടിലേക്കുള്ള യാത്ര അത്യാവശ്യമായവർക്കാണ് ആദ്യ വിമാനത്തിൽ പോകാൻ അവസരം ലഭിച്ചത്. വിമാനത്തിൽ സാമൂഹിക അകലം പാലിക്കാൻ സീറ്റുകൾ ഒഴിച്ചിടില്ല. പകരം, പിന്നിലെ ഒമ്പത് സീറ്റുകൾ മാറ്റി വെക്കും. യാത്രക്കിടെ ആർക്കെങ്കിലും അസ്വസ്ഥത ഉണ്ടായാൽ അവരെ ഈ സീറ്റിലേക്ക് മാറ്റി ക്വാറൻറീൻ ചെയ്യും.
വിമാനത്തിൽ കയറുന്നതിന് മുമ്പ് യാത്രക്കാർക്ക് കോവിഡ് പരിശോധന ഉണ്ടായിരിക്കില്ല. പകരം തെർമൽ സ്ക്രീനിങ് നടത്തിയാകും യാത്രക്കാരെ കയറ്റുക. ചുരുങ്ങിയ സമയത്തിനുള്ളിൽ ഇത്രയും പേരെ പരിശോധിച്ച് റിസൽട്ട് നേടിയതിന് ശേഷം മാത്രം യാത്ര എന്നത് പ്രായോഗികമായി ബുദ്ധിമുട്ടായതിനാലാണ് ഒഴിവാക്കേണ്ടി വന്നതെന്ന് അധികൃതർ സൂചിപ്പിച്ചിരുന്നു. എന്നാൽ കോവിഡ് രോഗലക്ഷണങ്ങൾ പ്രത്യക്ഷാ തന്നെ പ്രകടമാക്കുന്നവരെ വിമാനത്തിൽ കയറാൻ അനുവദിക്കില്ല.
മെയ് 11ന് തിങ്കളാഴ്ച കോഴിക്കോടേക്ക് പുറപ്പെടുന്ന രണ്ടാമത്തെ വിമാനത്തിൽ പോകാൻ അവസരം ലഭിച്ചവർക്ക് ശനിയാഴ്ച രാവിലെ 10 മുതൽ ടിക്കറ്റ് വിതരണം ആരംഭിക്കും. തെരഞ്ഞെടുക്കപ്പെട്ടവരെ എംബസിയിൽനിന്ന് വിവരം അറിയിച്ച് തുടങ്ങിയിട്ടുണ്ട്. നാട്ടിലേക്ക് തിരിച്ചുപോകുന്നതിന് 13,000ലധികം പേരാണ് ഇതുവരെ ഇന്ത്യൻ എംബസിയിൽ രജിസ്റ്റർ ചെയ്തത്. ആദ്യവാരത്തിൽ രണ്ട് വിമാനങ്ങളാണ് ബഹ്റൈനിൽ നിന്നുമുള്ളത്. അടുത്ത പട്ടിക പുറത്തു വരുമ്പോൾ കൂടുതൽ വിമാനങ്ങൾ ഉണ്ടാകുമെന്ന പ്രതീക്ഷയിലാണ് നാട്ടിലേക്ക് പോകാനായി അവസരം കാത്തിരിക്കുന്ന മറ്റു പ്രവാസികൾ.
ബഹ്റൈൻ വാർത്ത നൈറ്റ് അപ്ഡേറ്റ്സ് – മെയ് 7, വീഡിയോ കാണാം:
