സുധീർ തിരുനിലത്ത്​ പ്രവാസി ലീഗൽ സെൽ ബഹ്റൈന്റെ പുതിയ കൺട്രി ഹെഡ്​

മനാമ: പ്രവാസി ലീഗൽ സെൽ ബഹ്​റൈൻ കൺട്രി ഹെഡ്​ ആയി സാമൂഹിക പ്രവർത്തകനായ സുധീർ തിരുനിലത്ത്​ നിയമിതനായി. പ്രവാസികളെ നിയമപരമായി ശാക്​തീകരിക്കുക എന്ന ലക്ഷ്യത്തോടെ കഴിഞ്ഞ 10 വർഷമായി ഡൽഹി ആസ്​ഥാനമായി പ്രവർത്തിക്കുന്ന സ്വകാര്യ സംഘടനയാണ്​ പ്രവാസി ലീഗൽ സെൽ. പ്രവാസികൾക്ക് ആവശ്യമായ നിയമ സഹായമെത്തിക്കുകയാണ് സെല്ലിന്റെ പ്രധാന ലക്ഷ്യം.

29 വർഷമായി ബഹ്​റൈനിൽ താമസിക്കുന്ന സുധീർ തിരുനിലത്ത്​ സാമൂഹിക, സാസ്​കാരിക മേഖലകളിൽ സുപരിചിതനാണ്​. വിവിധ സംഘടനകളുടെ ഭാരവാഹിത്വം വഹിച്ചിട്ടുള്ള ഇദ്ദേഹം കോവിഡ്​ കാലത്ത്​ നിരവധി ആളുകളെ നാട്ടിലെത്താൻ സഹായിച്ചിട്ടുണ്ട്​. ബഹ്​റൈൻ കൺട്രി ഹെഡ്​ ആയി സുധീർ തിരുനിലത്തിന്റെ നിയമനം പ്രവാസികൾക്ക്​ ഏറെ സഹായകരമാകുമെന്ന്​ പ്രവാസി ലീഗൽ സെൽ ഗ്ലോബൽ പ്രസിഡൻറ്​ അഡ്വ. ജോസ്​ എബ്രഹാം പറഞ്ഞു. പ്രവാസി ലീഗൽ സെല്ലി​െൻറ ബഹ്​റൈൻ കോഓർഡിനേറ്ററായി അമൽദേവും പ്രവർത്തിച്ചുവരുന്നു.