മനാമ: പുതിയ അധ്യയന വർഷത്തില്‍ വിദ്യാർത്ഥികളെ അഭിനന്ദിച്ച് രാജാവ് ഹമദ് ബിൻ ഈസ അൽ ഖലീഫ. 2021-2022 അധ്യയന വർഷത്തില്‍ വിദ്യാഭ്യാസ ജീവനക്കാരെയും വിദ്യാർത്ഥികളെയും പൊതു, സ്വകാര്യ വിദ്യാഭ്യാസ സ്ഥാപനങ്ങളിലേക്ക് സ്വാഗതം ചെയ്തു.
കിരീടാവകാശിയും പ്രധാനമന്ത്രിയുമായ സൽമാൻ ബിൻ ഹമദ് അൽ ഖലീഫയുടെ നേതൃത്വത്തിലുള്ള സർക്കാരിന്റെ പിന്തുണയ്ക്കും സുപ്രീം കൗൺസിലിന്റെ തുടർനടപടികൾക്കും നന്ദി പറഞ്ഞ് കഴിഞ്ഞ അധ്യയന വർഷത്തിൽ നേടിയ മികച്ച നേട്ടങ്ങളെയും രാജാവ് പ്രശംസിച്ചു. കൊറോണ വൈറസ് പകർച്ചവ്യാധി ലോകത്താകമാനം ബാധിച്ചിരിക്കുമ്പോഴും വിദ്യാഭ്യാസത്തിന്റെ സുസ്ഥിരത ഉറപ്പാക്കാൻ നടത്തിയ ശ്രദ്ധേയമായ ശ്രമങ്ങളെയും അദ്ദേഹം അഭിനന്ദിച്ചു.
ബഹ്റൈൻ ജനതയിൽ പുതിയ നേട്ടങ്ങൾ എത്തിക്കുന്നത് തുടരുമെന്ന് രാജാവ് പറഞ്ഞു, വിദ്യാർത്ഥികള്‍ രാജ്യത്തിന്റെ യഥാർത്ഥ സ്വത്താണെന്നും വളർച്ചയുടെയും സമൃദ്ധിയുടെയും സ്തംഭമെന്നും അദ്ദേഹം വിദ്യാർത്ഥികളെ വിശേഷിപ്പിച്ചു. വിദ്യാർത്ഥികളുടെ സർഗ്ഗാത്മകത വർദ്ധിപ്പിക്കുന്നതിനും ആധുനിക കഴിവുകളോടെ അവരെ സജ്ജരാക്കുന്നതിനും ഇത് അവരെ പ്രാപ്തമാക്കും. സഹവർത്തിത്വത്തിന്റെയും സഹിഷ്ണുതയുടെയും പ്രബുദ്ധതയുടെയും മാതൃകയായി രാജ്യത്തിന്റെ സ്ഥാനം ഉറപ്പിക്കുന്നതിനുള്ള വിദ്യാഭ്യാസ പ്രക്രിയയ്ക്ക് തുടർച്ചയായ പിന്തുണയും അദ്ദേഹം പ്രഖ്യാപിച്ചു.
