മനാമ: ബെൽജിയത്തിലെ ബ്രസൽസിൽ നടന്ന 26ാമത് ഗൾഫ് സഹകരണ കൗൺസിൽ-യൂറോപ്യൻ യൂനിയൻ മന്ത്രിതല യോഗത്തിൽ വിദേശകാര്യ മന്ത്രി ഡോ. അബ്ദുല്ലത്തീഫ് ബിൻ റാഷിദ് അൽ സയാനി പങ്കെടുത്തു. സൗദി അറേബ്യയുടെ വിദേശകാര്യ മന്ത്രി ഫൈസൽ ബിൻ ഫർഹാൻ അൽ സൗദ് രാജകുമാരന്റെ അധ്യക്ഷതയിൽ നടന്ന യോഗത്തിൽ യൂറോപ്യൻ കൗൺസിൽ പ്രസിഡന്റ് ചാൾസ് മൈക്കേൽ, ജി.സി.സി സെക്രട്ടറി ജനറൽ ഡോ. നാഇഫ് ഫലാഹ് അൽ ഹജ്റാഫ് എന്നിവരും പങ്കെടുത്തു.
വിവിധ സാമ്പത്തിക, രാഷ്ട്രീയ, സുരക്ഷാ മേഖലകളിലെ ഗൾഫ്-യൂറോപ്യൻ ബന്ധങ്ങളെക്കുറിച്ചും സഹകരണം വർദ്ധിപ്പിക്കുന്നതിനും പരസ്പര താൽപ്പര്യങ്ങൾ വികസിപ്പിക്കുന്നതിനുമുള്ള മാർഗങ്ങളെക്കുറിച്ചും മന്ത്രിമാർ ചർച്ച ചെയ്തു.
രാഷ്ട്രീയ സംവാദം, പ്രാദേശിക സുരക്ഷ, ഭീകരവാദം, വ്യാപാരം, നിക്ഷേപം, ഊർജം, കാലാവസ്ഥാ വ്യതിയാനം, വിദ്യാഭ്യാസം, ആരോഗ്യം, സൈബർ സുരക്ഷ തുടങ്ങി വിവിധ മേഖലകളിൽ ജിസിസിയും ഇയുവും തമ്മിലുള്ള ബന്ധം ശക്തിപ്പെടുത്തേണ്ടതിന്റെ പ്രാധാന്യത്തെക്കുറിച്ച് മന്ത്രിമാർ അവലോകനം നടത്തി. 2022-2027 കാലയളവിലെ സംയുക്ത സഹകരണ പരിപാടിക്ക് ഇരു കക്ഷികളും അംഗീകാരം നൽകുകയും പരസ്പര വിശ്വാസം വർദ്ധിപ്പിക്കുന്നതിനും പൊതു താൽപ്പര്യങ്ങൾ കൈവരിക്കുന്നതിനും പ്രാദേശികവും ആഗോളവുമായ സുരക്ഷ നിലനിർത്തുന്നതിനും ഈ പങ്കാളിത്തം സഹായിക്കുമെന്ന് ഊന്നിപ്പറഞ്ഞു.