മനാമ: ഒന്നിലധികം രാജ്യങ്ങളില്‍ ബിസിനസ് പ്രവര്‍ത്തനങ്ങള്‍ വ്യാപിപ്പിച്ചിട്ടുള്ള ബഹുരാഷ്ട്ര സംരഭങ്ങള്‍ക്ക് (എം.എന്‍.ഇ) പുതിയ നികുതി ഏര്‍പ്പെടുത്താനുള്ള നിയമം ചൊവ്വാഴ്ച ശൂറ കൗണ്‍സില്‍ ചര്‍ച്ച ചെയ്യും. പാര്‍ലമെന്റ് അംഗീകാരത്തെത്തുടര്‍ന്നാണ് നിര്‍ദേശം ചര്‍ച്ചക്കും വോട്ടിനുമിടുന്നത്. പുതിയ നിയമ പ്രകാരം ഇത്തരം കമ്പനികള്‍ക്കുള്ള കുറഞ്ഞ നികുതി 15 ശതമാനമാണ്.
നിര്‍ദ്ദിഷ്ട നിയമപ്രകാരം രാജ്യത്ത് 348 ബഹുരാഷ്ട്ര കമ്പനികള്‍ നിന്നായി 130 ദശലക്ഷം ദിനാര്‍ വാര്‍ഷിക നികുതി വരുമാനം പ്രതീക്ഷിക്കുന്നുണ്ടെന്ന് ധനകാര്യ മന്ത്രി ശൈഖ് സല്‍മാന്‍ ബിന്‍ ഖലീഫ ആല്‍ ഖലീഫ പറഞ്ഞു. ഈ വരുമാനം ബഹ്‌റൈന്റെ സാമ്പത്തിക സ്ഥിതിക്ക് കാര്യമായ സംഭാവനയാകുമെന്നും അദ്ദേഹം കൂട്ടിച്ചേര്‍ത്തു.
ധനപരമായ സുസ്ഥിരത കൈവരിക്കാന്‍ സര്‍ക്കാര്‍ പ്രതിജ്ഞാബദ്ധമാണെന്നും ശൈഖ് സല്‍മാന്‍ പറഞ്ഞു. കൂടാതെ വിദേശ നിക്ഷേപത്തിനുള്ള ആകര്‍ഷകമായ രാജ്യമെന്ന നിലയില്‍ ബഹ്‌റൈന്റെ സ്ഥാനം ശക്തിപ്പെടുമെന്നും അദ്ദേഹം കൂട്ടിച്ചേര്‍ത്തു.
