മനാമ: ഖത്തര്‍ ഗതാഗത മന്ത്രി ഷെയ്ഖ് മുഹമ്മദ് ബിന്‍ അബ്ദുല്ല അല്‍ താനി ബഹ്റൈനില്‍. രാജ്യങ്ങള്‍ തമ്മിലുള്ള സാമ്പത്തിക, നിക്ഷേപ സഹകരണം വര്‍ദ്ധിപ്പിക്കുന്നതിനുള്ള അവസരങ്ങളെ കുറിച്ച് ചര്‍ച്ച ചെയ്യാനും കര ഗതാഗതം, റെയില്‍വേ, സമുദ്ര നാവിഗേഷന്‍, സിവില്‍ ഏവിയേഷന്‍ എന്നിവയില്‍ സാങ്കേതിക വൈദഗ്ദ്ധ്യം കൈമാറുന്നതിനുമാണ് സന്ദര്‍ശനം ലക്ഷ്യമിടുന്നത്.
ഗതാഗത, ടെലികമ്മ്യൂണിക്കേഷന്‍ മന്ത്രി ഡോ. ഷെയ്ഖ് അബ്ദുള്ള ബിന്‍ അഹമ്മദ് അല്‍ ഖലീഫ ഖത്തര്‍ ഗതാഗത മന്ത്രിയെ സ്വീകരിച്ചു. ഖത്തറുമായുള്ള ചരിത്രപരമായ ബന്ധവും തന്ത്രപരമായ വികസന പങ്കാളിത്തവും ശക്തിപ്പെടുത്തുന്നതിനുള്ള ബഹ്റൈന്റെ പ്രതിബദ്ധത ഗതാഗത, ടെലികമ്മ്യൂണിക്കേഷന്‍ മന്ത്രി ആവര്‍ത്തിച്ച് വ്യക്തമാക്കി. മന്ത്രാലയ ആസ്ഥാനത്താണ് ഔദ്യോഗിക കൂടിക്കാഴ്ച നടന്നത്.
40 കിലോമീറ്റര്‍ ദൈര്‍ഘ്യമുള്ള ബഹ്റൈന്-ഖത്തര്‍ അതിവേഗ കോസ്വേ, സംയുക്ത സമുദ്ര ലിങ്കേജ് പദ്ധതി എന്നിവയുള്‍പ്പെടെയുള്ള തന്ത്രപരമായ സംരംഭങ്ങള്‍ കൂടിക്കാഴ്ചയില്‍ അവലോകനം ചെയ്തു. സുസ്ഥിര വികസനം പ്രോത്സാഹിപ്പിക്കുന്നതിനും, ജനങ്ങളുടെയും ചരക്കുകളുടെയും ചലനം സുഗമമാക്കുന്നതിനും, മേഖലയിലുടനീളം വ്യാപാരം, ടൂറിസം, ലോജിസ്റ്റിക്‌സ് എന്നിവ മെച്ചപ്പെടുത്തുന്നതിനുമാണ് ഈ സംരംഭങ്ങള്‍ രൂപകല്‍പ്പന ചെയ്തിരിക്കുന്നത്.
