മനാമ: യുഎസ് അംബാസഡർ സ്റ്റീവൻ ബോണ്ടിയുമായി കൂടിക്കാഴ്ച നടത്തി കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ. റിഫ പാലസിൽ നടന്ന കൂടിക്കാഴ്ചയിൽ ബഹ്‌റൈനും യുഎസും തമ്മിലുള്ള ചരിത്രപരമായ ബന്ധങ്ങളെ ഇരുവരും എടുത്തുപറഞ്ഞു. വിവിധ മേഖലകളിലായി വ്യാപിച്ചുകിടക്കുന്ന ബന്ധങ്ങൾ കൂടുതൽ ശക്തിപ്പെടുത്താനുള്ള പൊതുവായ പ്രതിബദ്ധതയും കിരീടാവകാശി അറിയിച്ചു.
സമഗ്ര സുരക്ഷ ഏകീകരണ കരാർ പോലുള്ള സംയുക്ത കരാറുകൾ ഈ പങ്കാളിത്തത്തിനെ കൂടുതൽ ശക്തിപ്പെടുത്തിയിട്ടുണ്ടെന്നും അതുമൂലം ഇരു രാജ്യങ്ങളും തമ്മിലുള്ള സഹകരണം ഗണ്യമായി വർധിച്ചുവെന്നും കിരീടാവകാശി ചൂണ്ടിക്കാട്ടി. രാജ്യത്തെ സുസ്ഥിരമായ വികസനം മുന്നോട്ടുകൊണ്ടുപോകുന്നതിനുള്ള പ്രധാന കാരണങ്ങളായ സുരക്ഷയും സ്ഥിരതയും നിലനിർത്തുന്നതിൽ യു.എസിന്‍റെ നിർണായക പങ്കിനെയും അദ്ദേഹം അടിവരയിട്ടു.
കൂടാതെ, പ്രാദേശികവും ആഗോളവുമായ സംഭവവികാസങ്ങളും പൊതു താൽപര്യമുള്ള വിഷയങ്ങളും ഇരുവരും ചർച്ച ചെയ്തു. പ്രധാനമന്ത്രിയുടെ കോർട്ട് മന്ത്രി ശൈഖ് ഈസ ബിൻ സൽമാൻ ബിൻ ഹമദ് അൽ ഖലീഫ, ദേശീയ ധനകാര്യ മന്ത്രി ശൈഖ് സൽമാൻ ബിൻ ഖലീഫ അൽ ഖലീഫ എന്നിവരും മറ്റു ഉദ്യോഗസ്ഥരും കൂടിക്കാഴ്ചയിൽ പങ്കെടുത്തു.
