മനാമ: ബഹ്റൈന് പ്രവാസി സുനില്‍ തോമസ് റാന്നി എഴുതുന്ന ആദ്യ പുസ്തകം ‘ട്രാവല്‍ ഫീല്‍സ് ആന്‍ഡ് ഫീഡ്‌സ്’ പുസ്തക പ്രകാശനം പത്തനംതിട്ട റോയല്‍ ഓഡിറ്റോറിയത്തില്‍വച്ച് ജൂലൈ 11ന് സംഘടിപ്പിക്കുന്നു. കെപിസിസിയുടെ പ്രസിദ്ധീകരണ വിഭാഗമായ പ്രിയദര്‍ശിനി പബ്ലിക്കേഷന്‍സ് സൊസൈറ്റിയാണ് പുസ്തകം പ്രസിദ്ധീകരിക്കുന്നത്.
പ്രിയദര്‍ശിനി പബ്ലിക്കേഷന്‍സ് ചെയര്‍മാനും കെപിസിസി പ്രസിഡന്റുമായ സണ്ണി ജോസഫ് എം.എല്‍.എ പുസ്തക പ്രകാശനം നിര്‍വഹിക്കും. വൈസ് ചെയര്‍മാന്‍ പഴകുളം മധുവിന്റെ അധ്യക്ഷതയില്‍ യുഡിഎഫ് കണ്‍വീനര്‍ അടൂര്‍ പ്രകാശ് എംപി പുസ്തകം സ്വീകരിക്കും. ചടങ്ങില്‍ ഡിസിസി പ്രസിഡന്റ് പ്രൊഫ. സതീഷ് കൊച്ചു പറമ്പില്‍, പ്രിയദര്‍ശിനി പബ്ലിക്കേഷന്‍ പത്തനംതിട്ട ജില്ലാ കോഡിനേറ്റര്‍ ജി. രഘുനാഥ് തുടങ്ങിയവര്‍ പങ്കെടുക്കും.
ടൂറിസം രംഗത്ത് ഗ്രാമീണത പ്രോത്സാഹനതിന്റെ ആവശ്യകത എടുത്തുപറഞ്ഞുകൊണ്ട് എഴുതുന്ന ഈ പുസ്തകം നാടന്‍ യാത്ര പ്രേമികള്‍ക്ക് നല്ലൊരു റഫറന്‍സ് ഗ്രന്ഥമാണ്. കേരളത്തിലെ വിനോദസഞ്ചാര കേന്ദ്രങ്ങള്‍ വിശേഷിച്ച് പത്തനംതിട്ട ജില്ലയിലെ ഇനിയും ഏറെ വികസന പാതയില്‍ എത്തുന്ന രീതിയിലുള്ള നിര്‍ദേശങ്ങള്‍ കൂടി ഉള്‍പ്പെടുത്തിക്കൊണ്ടുള്ള പുസ്തകം ആണ് ഇറങ്ങുന്നത്.
ബഹ്റൈനില്‍ റിക്രൂട്ട്‌മെന്റ് കണ്‍സള്‍ട്ടന്‍സി സര്‍വീസ് സ്ഥാപനം നടത്തുകയാണ് സുനില്‍ തോമസ് റാന്നി. ഒരു പതിറ്റാണ്ടിലേറെയായി പ്രവാസജീവിതം നയിക്കുന്ന സുനില്‍ തോമസ് പത്തനംതിട്ട ജില്ലയിലെ റാന്നി കീക്കൊഴൂര്‍ സ്വദേശിയാണ്. ഭാര്യ ബിന്‍സി സ്വകാര്യ സ്ഥാപനത്തില്‍ നഴ്‌സ് ആയി ബഹ്റൈനില്‍ ജോലി ചെയ്യുന്നു. മൂന്നു വയസുള്ള ഹര്‍ലീന്‍ ഗ്ലോറി സുനില്‍, ഹന്ന റിയ സുനില്‍ എന്നിവര്‍ മക്കളാണ്.
പത്രങ്ങളിലെ കത്തുകള്‍ എന്ന കോളത്തില്‍ പ്രസിദ്ധീകരിച്ച തെരഞ്ഞെടുത്ത നൂറു കത്തുകള്‍ അടുത്തതായി പ്രസിദ്ധീകരണത്തിനുള്ള പണിപ്പുരയിലാണ്. ഉടന്‍തന്നെ ഒരു കവിതാ സമാഹാരവും പുറത്തിറക്കാനുള്ള അണിയറ പ്രവര്‍ത്തനങ്ങള്‍ പുരോഗമിക്കുന്നു.
‘ട്രാവല്‍ ഫീല്‍സ് ആന്‍ഡ് ഫീഡ്‌സ്’ പുസ്തകം ആമസോണ്‍ അടക്കം ഓണ്‍ലൈന്‍ സൈറ്റുകളില്‍ ലഭ്യമാക്കുന്നതാണ്. പ്രിയദര്‍ശിനി പബ്ലിക്കേഷന്‍സ് ബഹ്റൈന് ചാപ്റ്റര്‍ രൂപീകരിച്ചശേഷം പുറത്തിറക്കുന്ന ആദ്യ പുസ്തകമാണ് ‘ട്രാവല്‍ ഫീല്‍സ് ആന്‍ഡ് ഫീഡ്‌സ്’.
