മനാമ: ബഹ്‌റൈനില്‍ 15 വയസ്സിന് മുകളില്‍ പ്രായമുള്ളവരില്‍ 18.1 ശതമാനം പേര്‍ പുകവലിക്കുന്നതായി റിപ്പോര്‍ട്ട്. 2025-ലെ ഗവേഷണ റിപ്പോര്‍ട്ടുകള്‍ അടിസ്ഥാനമാക്കി ബഹ്റൈന്‍ ആന്റി-സ്‌മോക്കിംഗ് സൊസൈറ്റി അംഗം ഡോ. ഫാത്തിമ അല്‍മത്റൂക് ആണ് ഈ വിവരം വെളിപ്പെടുത്തിയത്.
ലോക ശ്വാസകോശ അര്‍ബുദ ദിനത്തോട് അനുബന്ധിച്ചാണ് ഡോക്ടര്‍ ഈ കണക്കുകള്‍ പുറത്തുവിട്ടത്. എത്രയും വേഗം പുകവലി ഉപേക്ഷിക്കുന്നത് ശ്വാസകോശ അര്‍ബുദം വരാനുള്ള സാധ്യത കുറയ്ക്കുമെന്നും അവര്‍ ഓര്‍മിപ്പിച്ചു. പുകയിലയില്‍ ഏകദേശം 7,000 രാസവസ്തുക്കളാണ് അടങ്ങിയിട്ടുള്ളത്. ഇതില്‍ 70 ല്‍ അധികവും കാന്‍സറിന് കാരണമാകുന്നവയാണ്.
ഈ രാസവസ്തുക്കള്‍ ശ്വാസകോശത്തിലെയും ശ്വസന വ്യവസ്ഥയിലെയും കോശങ്ങളെ നശിപ്പിക്കുകയും കാലക്രമേണ അര്‍ബുദമായി മാറുകയും ചെയ്യും. ശ്വാസകോശ അര്‍ബുദം ബാധിച്ചവരില്‍ 85 മുതല്‍ 90 ശതമാനം വരെ ആളുകള്‍ക്ക് പുകവലിയുമായി നേരിട്ടോ അല്ലാതെയോ ബന്ധമുണ്ടെന്ന് ഡോ. ഫാത്തിമ വ്യക്തമാക്കി.
