മനാമ: പൊതുസ്ഥലങ്ങളിൽ, പ്രത്യേകിച്ച് വാഹനമോടിക്കുമ്പോൾ മുതിർന്നവർ ബേബി പാസിഫയറുകൾ ഉപയോഗിക്കുന്ന പ്രവണത വർദ്ധിച്ചുവരുന്നതായി ബഹ്‌റൈൻ എംപിമാർ. ഇത് തടയാൻ കർശന നടപടി സ്വീകരിക്കണമെന്ന് എംപിമാർ ആവശ്യപ്പെട്ടു.
രാജ്യത്തുടനീളം പാസിഫയർ ഉപയോഗിക്കുന്നത് അന്വേഷിക്കണമെന്ന് പാർലമെന്റിന്റെ വിദേശകാര്യ, പ്രതിരോധ, ദേശീയ സുരക്ഷാ കമ്മിറ്റി വൈസ് ചെയർമാൻ ഹസ്സൻ ഇബ്രാഹിം ആഭ്യന്തര മന്ത്രാലയത്തോട് ഔദ്യോഗികമായി ആവശ്യപ്പെട്ടു.
“ഇത് വിചിത്രമല്ല. പൊതു ധാർമ്മികതയുടെ ലംഘനമാണ്.” ഇബ്രാഹിം പറഞ്ഞു. “വായിൽ പാസിഫയറുകൾ വെച്ച് വാഹനമോടിക്കുന്ന പ്രായപൂർത്തിയായ പുരുഷന്മാരെയും സ്ത്രീകളെയും കാണുന്നുവെന്ന പരാതികളുമായി ആളുകൾ പാർലമെന്റിനെ സമീപിക്കുന്നുണ്ട്. വിദേശത്ത് നിന്ന് വന്ന ഒരു പ്രവണതയാണ് ഇത്. ഇപ്പോൾ ഇത് നമ്മുടെ സമൂഹത്തെ ആക്രമിക്കുന്നു.”, അദ്ദേഹം കൂട്ടിച്ചേർത്തു.
ചൈനയിൽ ഉത്ഭവിച്ച ഈ രീതി അടുത്തിടെ ആഗോള ശ്രദ്ധ നേടിയിട്ടുണ്ട്. ഓരോ മാസവും ആയിരക്കണക്കിന് മുതിർന്ന പാസിഫയറുകൾ വിൽക്കുന്നതായി ഓൺലൈൻ പ്ലാറ്റ്‌ഫോമുകൾ റിപ്പോർട്ട് ചെയ്യുന്നു. ചില കടകൾ പ്രതിമാസം 2,000 യൂണിറ്റിലധികം വിൽപ്പന നടത്തിയതായി അവകാശപ്പെടുന്നു.
മുതിർന്നവർക്കായി പ്രത്യേകം രൂപകൽപ്പന ചെയ്‌തിരിക്കുന്ന പാസിഫയറുകൾ ഉത്കണ്ഠ ശമിപ്പിക്കുന്നതിനും പുകവലി നിർത്തുന്നതിനും ശ്വസനം മെച്ചപ്പെടുത്തുന്നതിനുമുള്ള ഉപകരണമായാണ് വിപണനം ചെയ്യപ്പെടുന്നത്.
