മനാമ: ബഹ്റൈന് പ്രതിഭ മുഹറഖ് മേഖലയുടെ ആഭിമുഖ്യത്തില്‍ മേഖലാ സമ്മേളന അനുബന്ധ പരിപാടിയായി കിംസ് ഹെല്‍ത്ത് ഹോസ്പിറ്റലുമായി സഹകരിച്ച് കിംസ് ഹോസ്പിറ്റലില്‍ സൗജന്യ മെഡിക്കല്‍ ക്യാമ്പ് സംഘടിപ്പിച്ചു. ജീവിത ശൈലി രോഗങ്ങള്‍ തിരിച്ചറിയുന്നതിനുള്ള ടെസ്റ്റുകളും ഡോക്ടറുടെ സേവനവും ക്യാമ്പിന്റെ ഭാഗമായി ഉണ്ടായിരുന്നു.
മുന്നൂറിലധികം പേര്‍ മുന്‍കൂട്ടി രജിസ്റ്റര്‍ ചെയ്തും അല്ലാതെയുമായി ക്യാമ്പില്‍ പങ്കെടുത്തു. ഡോ. ആകാശ് ശശിധരന്‍ തൈറോയ്ഡ്, ഹെര്‍ണിയ തുടങ്ങിയ രോഗങ്ങളെ കുറിച്ചുള്ള ക്ലാസ് നയിച്ചു. മുഹറഖ് മേഖല പ്രസിഡന്റ് സജീവന്‍ മാക്കണ്ടി അധ്യക്ഷത വഹിച്ച ചടങ്ങില്‍ ബഹ്റൈന് പ്രതിഭ പ്രസിഡന്റ് ബിനു മണ്ണില്‍ ക്യാമ്പിന്റെ ഔദ്യോഗിക ഉദ്ഘാടനം നിര്‍വ്വഹിച്ചു.
മുഹറഖ് മേഖല സെക്രട്ടറി ബിനു കരുണാകരന്‍ സ്വാഗതവും, പ്രതിഭ സെക്രട്ടറി മിജോഷ് മൊറാഴ, പ്രതിഭ രക്ഷാധികാരി പി ശ്രീജിത്ത്, ഹെല്‍പ് ലൈന്‍ കണ്‍വീനര്‍ ജയേഷ് എന്നിവര്‍ ആശംസയും മേഖല ഹെല്‍പ് ലൈന്‍ കണ്‍വീനര്‍ ഗിരീഷ് കല്ലേരി നന്ദിയും പറഞ്ഞു. സൗജന്യമായി ക്യാമ്പ് നടത്തിയതിന് ഹോസ്പിറ്റലിനുള്ള ഉപഹാരം പ്രതിഭ സെക്രട്ടറി മിജോഷും ഡോ. ആകാശിനുള്ള ഉപഹാരം പ്രതിഭ പ്രസിഡന്റ് ബിനു മണ്ണിലും കൈമാറി.
ക്യാമ്പില്‍ പങ്കെടുത്തവര്‍ക്ക് പത്ത് ദിവസത്തിനുള്ളില്‍ സൗജന്യ കണ്‍സള്‍ട്ടേഷന്‍ ഉണ്ടായിരിന്നു. മേഖല എക്‌സിക്യുട്ടീവ് കമ്മറ്റി അംഗങ്ങള്‍ മേഖലയിലെ യൂണിറ്റ് എക്‌സിക്യൂട്ടീവ് അംഗങ്ങള്‍, പ്രതിഭ കേന്ദ്ര കമ്മറ്റി അംഗങ്ങള്‍, രക്ഷാധികാരി അംഗങ്ങള്‍ തുടങ്ങിയവര്‍ ക്യാമ്പിന്റെ ഭാഗമായി. രാവിലെ എട്ടുമണിക്ക് തുടങ്ങിയ ക്യാമ്പ് ഉച്ചയ്ക്ക് പന്ത്രണ്ട് മണിക്ക് അവസാനിച്ചു.
