മനാമ: സ്റ്റുഡന്റ്സ് ഗൈഡന്‍സ് ഫോറം (എസ്ജിഎഫ്) ബഹ്റൈനിലെ കെസിഎ ഹാളില്‍ വെച്ച് അധ്യാപക ദിനം, നബി ദിനം, ഓണം എന്നിവ ഒരുമിച്ച് ആഘോഷിച്ചു. അധ്യാപകര്‍, വിദ്യാര്‍ത്ഥികള്‍, കലാകാരന്മാര്‍, നേതാക്കള്‍ എന്നിവര്‍ പരിപാടിയില്‍ ഒത്തുചേര്‍ന്നു.
കേരള സോഷ്യല്‍ ആന്‍ഡ് കള്‍ച്ചറല്‍ അസോസിയേഷന്‍ പ്രസിഡന്റ് രാജേഷ് നമ്പ്യാര്‍ പരിപാടി ഔദ്യോഗികമായി ഉദ്ഘാടനം ചെയ്തു. ഓണം പ്രതിനിധീകരിക്കുന്ന ഒരുമ, നന്ദി, സാംസ്‌കാരിക ഐക്യം എന്നിവയുടെ മൂല്യങ്ങള്‍ എടുത്തുകാട്ടി അദ്ദേഹം ഹൃദ്യമായ ഓണ സന്ദേശം നല്‍കി.
ഇസ്ലാമിക പണ്ഡിതനും സമസ്ത കേരള സുന്നി ജമാഅത്ത് പ്രസിഡന്റുമായ ഫക്രുദ്ദീന്‍ കോയ തങ്ങള്‍ മുഖ്യ പ്രഭാഷണം നടത്തി. പ്രവാചകന്‍ മുഹമ്മദിന്റെ ജീവിതവും പഠനങ്ങളും അദ്ദേഹം വിശദീകരിക്കുകയും, ധാര്‍മികവും പുരോഗമനപരവുമായ ഒരു സമൂഹത്തിന്റെ രൂപീകരണത്തില്‍ വിദ്യാഭ്യാസത്തിന്റെ പ്രാധാന്യം എടുത്തുകാട്ടുകയും ചെയ്തു.
സ്റ്റുഡന്റ്സ് ഗൈഡന്‍സ് ഫോറം ചെയര്‍മാന്‍ എബ്രഹാം ജോണ്‍ പരിപാടിക്ക് അധ്യക്ഷത വഹിച്ചു. എസ്ജിഎഫിന്റെ ദൗത്യവും ദര്‍ശനവും ഒരുമിച്ച് മുന്നോട്ട് കൊണ്ടുപോകാന്‍ അദ്ദേഹം സമൂഹത്തെ ക്ഷണിച്ചു. കേരള കാത്തലിക് അസോസിയേഷന്‍ പ്രസിഡന്റ് ജെയിംസ് ജോണ്‍, ബഹ്റൈന് കേരള സമാജം ജനറല്‍ സെക്രട്ടറി വര്‍ഗീസ് കരക്കല്‍, ദി ഇന്ത്യന്‍ സ്‌കൂള്‍ എക്‌സ്‌കോം അംഗം ബിജു ജോര്‍ജ് എന്നിവര്‍ മുഖ്യാതിഥികളായിരുന്നു.
അധ്യാപക ദിനത്തോടനുബന്ധിച്ച്, വിവിധ സ്‌കൂളുകളില്‍ നിന്നുള്ള 60 അധ്യാപകര്‍ക്ക് അവരുടെ സമര്‍പ്പണത്തിനും സേവനത്തിനും നന്ദി സൂചകമായി റോസാപ്പൂക്കള്‍ നല്‍കി ആദരിച്ചു. അധ്യാപക സമൂഹത്തെ പ്രതിനിധീകരിച്ച് അധ്യാപകന്‍ വിജയ് കുമാര്‍ സദസിനെ അഭിസംബോധന ചെയ്തു.
കോഓര്‍ഡിനേറ്റര്‍ സയ്യിദ് ഹനീഫ് സ്വാഗതം പറഞ്ഞ ചടങ്ങില്‍, കേരള കാത്തലിക് അസോസിയേഷന്‍ പ്രസിഡന്റിന്റെയും എക്‌സിക്യൂട്ടീവ് കമ്മിറ്റി അംഗങ്ങളുടെയും പിന്തുണയ്ക്ക് ഡോ. ശ്രീദേവി രാജന്‍ നന്ദി പ്രകാശിപ്പിച്ചു. ഫീനിക്‌സ് കള്‍ച്ചറല്‍ ആന്‍ഡ് സ്‌പോര്‍ട്‌സ് ക്ലബിന് പ്രത്യേക നന്ദി അറിയിച്ചു.
മോനി ഒടിക്കണ്ടത്തില്‍, ഹരീഷ് നായര്‍, വേണുഗോപാല്‍, ജോണ്‍ ഹെന്റി, അനസ് റഹിം, തോമസ് ഫിലിപ്പ്, അന്‍വര്‍ സൂര്‍നാട്, സിനി ആന്റണി, വിജയ് കുമാര്‍, സേവി മാത്തുണ്ണി, വിനു ക്രിസ്റ്റി, ജിന്‍സ് ജോസഫ്, ഷാജി പോഴിയൂര്‍, ലിജോ ഫ്രാന്‍സിസ് തുടങ്ങിയ നിരവധി സമൂഹ നേതാക്കള്‍ പരിപാടിയില്‍ പങ്കെടുത്തു.
ഓണത്തിന്റെയും ഈദ് മിലാദിന്റെയും തീമുകളില്‍ സംഗീതം, നൃത്തം, പാരമ്പര്യം എന്നിവയിലൂടെ എസ്ജിഎഫ് അംഗങ്ങളുടെ ആകര്‍ഷകമായ സാംസ്‌കാരിക പരിപാടികള്‍ നടന്നു. ദി റബ്ബര്‍ ബാന്‍ഡിന്റെ മിന്നുന്ന പ്രകടനം പ്രേക്ഷകരെ ആവേശഭരിതരാക്കി. പരിപാടിക്ക് ശേഷം ഓണസദ്യയും ഒരുക്കിയിരുന്നു.
ചീഫ് കോ-ഓര്‍ഡിനേറ്റര്‍ ഡോ. ശ്രീദേവി രാജന്റെ നേതൃത്വത്തില്‍ ബബിന, റെജിന ഇസ്മയില്‍, ലിബി ജെയ്‌സണ്‍, ഡോ. നിനു എന്നിവര്‍ പരിപാടി ഏകോപിപ്പിച്ചു. എബ്രഹാം ജോണ്‍, സയ്യിദ് ഹനീഫ്, ബാബു കുഞ്ഞുരാമന്‍, റിച്ചാര്‍ഡ് കെഇ, ജേസണ്‍, ബോണി വര്‍ഗീസ്, തോമസ് ഫിലിപ്പ് എന്നിവരുടെ മാര്‍ഗനിര്‍ദേശം നല്‍കി. ബബിന അവതാരകയായ പരിപാടിക്ക് കോഓര്‍ഡിനേറ്റര്‍ റെജിന ഇസ്മയില്‍ നന്ദി അറിയിച്ചു.
