മനാമ: ഒക്ടോബര്‍ 12 നും 18 നും ഇടയില്‍ നടത്തിയ പരിശോധാനാ കാമ്പെയ്‌നുകളില്‍ 18 നിയമലംഘകരെ പിടികൂടുകയും 93 പേരെ നാടുകടത്തിയെന്നും ലേബര്‍ മാര്‍ക്കറ്റ് റെഗുലേറ്ററി അതോറിറ്റി (എല്‍എംആര്‍എ) അറിയിച്ചു. ആകെ 1,642 പരിശോധനാ കാമ്പെയ്നുകളും സന്ദര്‍ശനങ്ങളുമാണ് ഈ കാലയളവില്‍ നടത്തിയത്.
എല്ലാ ഗവര്‍ണറേറ്റുകളിലെയും വിവിധ കടകളില്‍ 1,613 പരിശോധന സന്ദര്‍ശനങ്ങള്‍ നടത്തിയതായി അതോറിറ്റി അറിയിച്ചു. കൂടാതെ 29 സംയുക്ത പരിശോധനാ കാമ്പെയ്നുകള്‍, ക്യാപിറ്റല്‍ ഗവര്‍ണറേറ്റില്‍ 14 കാമ്പെയ്നുകള്‍, മുഹറഖ് ഗവര്‍ണറേറ്റില്‍ 7 കാമ്പെയ്നുകള്‍, നോര്‍ത്തേണ്‍ ഗവര്‍ണറേറ്റില്‍ 3 കാമ്പെയ്നുകള്‍, സതേണ്‍ ഗവര്‍ണറേറ്റില്‍ 5 കാമ്പെയ്നുകള്‍ എന്നിവയും നടത്തി.
നാഷണാലിറ്റി, പാസ്പോര്‍ട്ട്‌സ് ആന്‍ഡ് റെസിഡന്‍സ് അഫയേഴ്സ് പ്രതിനിധീകരിക്കുന്ന ആഭ്യന്തര മന്ത്രാലയം, ഗവര്‍ണറേറ്റിലെ അതത് പോലീസ് ഡയറക്ടറേറ്റ്, ജനറല്‍ ഡയറക്ടറേറ്റ് ഓഫ് വെര്‍ഡിക്റ്റ് എന്‍ഫോഴ്സ്മെന്റ് ആന്‍ഡ് ആള്‍ട്ടര്‍നേറ്റീവ് സെന്റന്‍സിംഗ്, ജനറല്‍ ഡയറക്ടറേറ്റ് ഓഫ് ക്രൈം ഡിറ്റക്ഷന്‍ ആന്‍ഡ് ഫോറന്‍സിക് സയന്‍സ്, കോസ്റ്റ് ഗാര്‍ഡ് കമാന്‍ഡ്, ബഹ്റൈന് ടൂറിസം, എക്‌സിബിഷന്‍ അതോറിറ്റി, സോഷ്യല്‍ ഇന്‍ഷുറന്‍സ് ഓര്‍ഗനൈസേഷന്‍, ഗതാഗത, ടെലികമ്മ്യൂണിക്കേഷന്‍സ് മന്ത്രാലയം എന്നിവയും പരിശോധനകളില്‍ പങ്കെടുത്തു.
