മനാമ: ബഹ്റൈന് നേതൃത്വത്തെ പ്രശംസിച്ച് ഗള്‍ഫ് സഹകരണ കൗണ്‍സില്‍ (ജിസിസി) സെക്രട്ടറി ജനറല്‍ ജാസിം മുഹമ്മദ് അല്‍ബുദൈവി. രാജ്യത്തിന്റെ നേതൃത്വപരമായ പങ്കിനെ അടിവരയിടുന്നതാണ് ജിസിസി സുപ്രീം കൗണ്‍സിലിന്റെ 46-ാമത് ഉച്ചകോടിയുടെ ആതിഥേയത്വമെന്ന് അദ്ദേഹം പറഞ്ഞു. ബഹ്റൈന് നാഷണല്‍ മ്യൂസിയത്തില്‍ ജിസിസി ഉച്ചകോടി പവലിയന്‍ ഉദ്ഘാടനം ചെയ്ത് സംസാരിക്കുകയായിരുന്നു.
ജിസിസി പവലിയന്‍ ഗള്‍ഫ് ബന്ധങ്ങളുടെ ആഴവും ഉച്ചകോടിയുടെ വിജയം ഉറപ്പാക്കുന്നതിനുള്ള ബഹ്റൈന്റെ സമഗ്രമായ തയ്യാറെടുപ്പുകളെയും പ്രതിഫലിപ്പിക്കുന്നുവെന്ന് അദ്ദേഹം ചൂണ്ടിക്കാട്ടി. ജിസിസിക്കും അതിന്റെ കൂട്ടായ പ്രവര്‍ത്തനത്തിനും തുടര്‍ച്ചയായ പിന്തുണയ്ക്ക് രാജാവ് ഹമദ് ബിന്‍ ഈസ അല്‍ ഖലീഫയ്ക്കും കിരീടാവകാശിയും പ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് അല്‍ ഖലീഫയ്ക്കും അല്‍ബുദൈവി നന്ദി അറിയിച്ചു.
ജിസിസി രാജ്യങ്ങളിലെ സുരക്ഷ, സമ്പദ്വ്യവസ്ഥ, സുസ്ഥിര വികസനം എന്നിവയെക്കുറിച്ചുള്ള തന്ത്രപരമായ തന്ത്രപരമായ ചര്‍ച്ചകള്‍ നടക്കുന്നതിനാല്‍ 46-ാമത് ഗള്‍ഫ് ഉച്ചകോടിക്ക് പ്രത്യേക പ്രാധാന്യമുണ്ടെന്ന് അല്‍ബുദൈവി പറഞ്ഞു. അതേസമയം, ജിസിസിയുടെ ചരിത്രത്തെയും നേട്ടങ്ങളെയും കുറിച്ച് കൂടുതലറിയാന്‍ പവലിയന്‍ സന്ദര്‍ശിക്കാന്‍ ബഹ്റൈനിലെ പൗരന്മാരെയും താമസക്കാരെയും സെക്രട്ടറി ജനറല്‍ ക്ഷണിച്ചു. ഉച്ചകോടിക്ക് ഡിസംബര്‍ മൂന്നിന് ബഹ്റൈന് ആതിഥേയത്വം വഹിക്കും
