മനാമ: എല്ലാ ജോലിസ്ഥലങ്ങളിലും സ്ത്രീ തൊഴിലാളികള്‍ക്ക് ഇരിപ്പിടം നിര്‍ബന്ധമാക്കുന്നതിനുള്ള കരട് നിയമം ചൊവ്വാഴ്ച ബഹ്റൈന്‍ പാര്‍ലമെന്റ് ചര്‍ച്ച ചെയ്യും. എംപി ഹനാന്‍ ഫര്‍ദാന്‍ ആണ് ഈ നിര്‍ദേശം സമര്‍പ്പിച്ചത്.
ജോലി സാഹചര്യങ്ങള്‍ മെച്ചപ്പെടുത്തുക, ദീര്‍ഘനേരം നില്‍ക്കുന്നതിന്റെ പ്രത്യാഘാതങ്ങള്‍ ലഘൂകരിച്ച് സ്ത്രീകളുടെ ആരോഗ്യത്തെ പിന്തുണയ്ക്കുക, ഉല്‍പ്പാദനക്ഷമത വര്‍ദ്ധിപ്പിക്കുക എന്നിവയാണ് നിര്‍ദേശം ലക്ഷ്യമിടുന്നത്. കരട് നിയമം സ്വകാര്യ മേഖലയിലെ തൊഴില്‍ നിയമത്തില്‍ ഭേദഗതിയാണ് നിര്‍ദേശിക്കുന്നത്.
അതേസമയം, നിലവിലുള്ള നിയമങ്ങള്‍ ഇതിനകംതന്നെ സുരക്ഷിതമായ തൊഴില്‍ അന്തരീക്ഷം ഉറപ്പാക്കുന്നുവെന്നും സ്ത്രീകളെ ജോലിക്കെടുക്കുന്നതുമായി ബന്ധപ്പെട്ട സമഗ്രമായ വ്യവസ്ഥകള്‍ നിലവിലുണ്ടെന്നും തൊഴില്‍ മന്ത്രാലയം ചൂണ്ടിക്കാട്ടി. ഇരിപ്പിടങ്ങള്‍ക്കും മറ്റ് സൗകര്യങ്ങള്‍ക്കുമുള്ള ആവശ്യകതകള്‍ തൊഴില്‍ സുരക്ഷയെക്കുറിച്ചുള്ള ആര്‍ട്ടിക്കിള്‍ 166 പ്രകാരം ഭരണപരമായ കാര്യങ്ങളാണെന്നും പ്രാഥമിക നിയമനിര്‍മ്മാണത്തില്‍ ഭേദഗതി വരുത്താതെ തന്നെ മന്ത്രിതല തീരുമാനങ്ങളിലൂടെ നിയന്ത്രിക്കാമെന്നും മന്ത്രാലയവും വനിതാ സുപ്രീം കൗണ്‍സിലും പറഞ്ഞു.
നിലവിലുള്ള നിയമ നിര്‍മ്മാണം ജോലി ചെയ്യുന്ന സ്ത്രീകള്‍ക്ക് മതിയായ സംരക്ഷണം നല്‍കുന്നുണ്ടെന്ന് ബഹ്റൈന്‍ ചേംബര്‍ ഓഫ് കൊമേഴ്സ് ആന്‍ഡ് ഇന്‍ഡസ്ട്രി അഭിപ്രായപ്പെട്ടു. എന്നാല്‍ ജനറല്‍ ഫെഡറേഷന്‍ ഓഫ് ബഹ്റൈന്‍ ട്രേഡ് യൂണിയനുകളും ബഹ്റൈന്‍ ഫ്രീ ലേബര്‍ യൂണിയന്‍സ് ഫെഡറേഷനും ഭേദഗതിക്ക് ശക്തമായ പിന്തുണ പ്രഖ്യാപിച്ചു.
