മനാമ: കൊല്ലം പ്രവാസി അസോസിയേഷൻ (കെ.പി.എ) വനിതാ വിഭാഗമായ പ്രവാസി ശ്രീയുടെ ആഭിമുഖ്യത്തിൽ സ്ത്രീകൾക്കായി സംഘടിപ്പിച്ച സി.പി.ആർ (CPR) ട്രെയിനിങ് ക്ലാസ് ശ്രദ്ധേയമായി. ഉമ്മൽ ഹസ്സത്തെ കിംസ് ഹെൽത്ത് ഹോസ്പിറ്റലുമായി സഹകരിച്ച് നടത്തിയ പരിശീലന പരിപാടിയിൽ നാൽപ്പത്തിയഞ്ചിലധികം വനിതകൾ പങ്കെടുത്തു. അടിയന്തര സാഹചര്യങ്ങളിൽ ജീവൻ രക്ഷിക്കാൻ സഹായിക്കുന്ന പ്രാഥമിക ചികിത്സാ രീതികളെക്കുറിച്ച് പരിശീലനത്തിൽ വിശദീകരിച്ചു.
കെ.പി.എ പ്രസിഡന്റ് അനോജ് മാസ്റ്റർ പരിപാടി ഉദ്ഘാടനം ചെയ്തു. കിംസ് ഹെൽത്ത് ഹോസ്പിറ്റൽ ട്രെയ്നർ ഹെഡ് ദിവ്യയ്ക്ക് കെ.പി.എയുടെ ഉപഹാരം അദ്ദേഹം കൈമാറി. പ്രവാസി ശ്രീ ചെയർപേഴ്സൺ പ്രദീപ അരവിന്ദ് ചടങ്ങിൽ അധ്യക്ഷത വഹിച്ചു. വൈസ് ചെയർപേഴ്സൺ അഞ്ജലി രാജ് സ്വാഗതവും യൂണിറ്റ് ഹെഡ് ബ്ലസ്സി ജി. നന്ദിയും പറഞ്ഞു.
കെ.പി.എ ജനറൽ സെക്രട്ടറി പ്രശാന്ത് പ്രബുദ്ധൻ, വൈസ് പ്രസിഡന്റ് കോയിവിള മുഹമ്മദ് കുഞ്ഞ്, ട്രഷറർ മനോജ് ജമാൽ, സെക്രട്ടറിമാരായ അനിൽകുമാർ, രജീഷ് പട്ടാഴി, പ്രവാസി ശ്രീ ചെയർപേഴ്സൺ ഷാമില ഇസ്മായിൽ എന്നിവർ ആശംസകൾ നേർന്നു. പ്രവാസി ശ്രീ യൂണിറ്റ് ഹെഡ്മാരായ ഷാനി നിസാർ, ആൻസിയ ആസിഫ്, നസീമ ഷഫീക്, റസീല മുഹമ്മദ് എന്നിവർ പരിപാടിക്ക് നേതൃത്വം നൽകി. കെ.പി.എ സെൻട്രൽ കമ്മിറ്റി, ഡിസ്ട്രിക് കമ്മിറ്റി അംഗങ്ങളും ചടങ്ങിൽ സംബന്ധിച്ചു.
