മനാമ: വീടുകളിലെ അടുക്കളയിൽ പാചകം ചെയ്യുമ്പോൾ പുലർത്തുന്ന അശ്രദ്ധ വലിയ അപകടങ്ങൾക്ക് വഴിവെക്കുമെന്ന മുന്നറിയിപ്പുമായി ബഹ്റൈൻ പോലീസ്. അടുപ്പിൽ ഭക്ഷണം വെച്ചതിന് ശേഷം ശ്രദ്ധിക്കാതെ വിട്ടുപോകുന്നത് മൂലമുണ്ടാകുന്ന തീപിടുത്തങ്ങൾ രാജ്യത്ത് വർദ്ധിച്ചുവരുന്ന സാഹചര്യത്തിലാണ് അധികൃതർ ജാഗ്രതാ നിർദ്ദേശം നൽകിയത്.
2024 മുതൽ ഇതുവരെയായി ഇത്തരത്തിലുള്ള 180-ലധികം തീപിടുത്ത കേസുകൾ ബഹ്റൈനിൽ റിപ്പോർട്ട് ചെയ്തതായി ഹിദ്ദ് പോലീസ് സ്റ്റേഷൻ മേധാവി കേണൽ ഡോ. ഒസാമ ബഹാർ വ്യക്തമാക്കി. ആഭ്യന്തര മന്ത്രാലയത്തിന്റെ ‘അൽ അമൻ’ (Al Aman) സോഷ്യൽ മീഡിയ പരിപാടിയിൽ സംസാരിക്കുകയായിരുന്നു അദ്ദേഹം. പലപ്പോഴും ഭക്ഷണം കരിയുന്നതിനേക്കാൾ വേഗത്തിൽ തീ പടരാനും വീട് മുഴുവൻ അപകടത്തിലാകാനും ചെറിയൊരു അശ്രദ്ധ മതിയെന്ന് അദ്ദേഹം ഓർമ്മിപ്പിച്ചു.
ഫെബ്രുവരി പകുതിയോടെ വിശുദ്ധ റമദാൻ മാസം ആരംഭിക്കാനിരിക്കെയാണ് ഈ മുന്നറിയിപ്പ് എന്നത് ശ്രദ്ധേയമാണ്. നോമ്പ് തുറയ്ക്കായി ഇഫ്താർ വിഭവങ്ങൾ തയ്യാറാക്കാൻ കുടുംബങ്ങൾ കൂടുതൽ സമയം അടുക്കളയിൽ ചെലവഴിക്കുന്ന സമയമാണിത്. നോമ്പ് കാലത്തെ തിരക്കിനിടയിൽ അടുപ്പ് ഓഫാക്കാൻ മറന്നുപോകുന്നതോ, പാചകം ചെയ്യുമ്പോൾ അടുക്കളയിൽ നിന്ന് മാറിനിൽക്കുന്നതോ ഒഴിവാക്കണമെന്നും ഓരോ തവണയും അതീവ ജാഗ്രത പാലിക്കണമെന്നും അദ്ദേഹം അഭ്യർത്ഥിച്ചു.
