മനാമ: ബഹ്റൈൻ ആഭ്യന്തര മന്ത്രാലയത്തിന്റെ എമർജൻസി അലേർട്ട് സിസ്റ്റത്തിന്റെ രാജ്യവ്യാപകമായ പരീക്ഷണം വിജയകരമായി പൂർത്തിയാക്കി. അടിയന്തര സാഹചര്യങ്ങളിൽ പൊതുജനങ്ങൾക്ക് വേഗത്തിൽ ജാഗ്രതാ നിർദ്ദേശങ്ങൾ എത്തിക്കുന്നതിനുള്ള സംവിധാനത്തിന്റെ കാര്യക്ഷമത പരിശോധിക്കുന്നതിന്റെ ഭാഗമായാണ് ശനിയാഴ്ച രാത്രി 9:30-ന് മൊബൈൽ ഫോണുകളിലും സ്മാർട്ട് ഉപകരണങ്ങളിലും പരീക്ഷണാടിസ്ഥാനത്തിൽ സന്ദേശങ്ങൾ അയച്ചത്.
സിസ്റ്റം കൃത്യമായി പ്രവർത്തിക്കുന്നുണ്ടെന്നും അടിയന്തര ഘട്ടങ്ങളിൽ സന്ദേശങ്ങൾ ഫലപ്രദമായി ജനങ്ങളിലേക്ക് എത്തുന്നുണ്ടെന്നും ഉറപ്പാക്കാൻ ഈ പരീക്ഷണം സഹായിച്ചതായി മന്ത്രാലയം വ്യക്തമാക്കി.
ഐഫോൺ (iOS) ഉപയോക്താക്കൾ ശ്രദ്ധിക്കുക: അടിയന്തര അറിയിപ്പുകൾ തടസ്സമില്ലാതെ ലഭിക്കുന്നതിന് ഐഫോൺ ഉപയോക്താക്കൾ തങ്ങളുടെ ഫോണിലെ സോഫ്റ്റ്വെയർ വേർഷൻ കുറഞ്ഞത് 26.2 എങ്കിലും ആയി അപ്ഡേറ്റ് ചെയ്യണമെന്ന് മന്ത്രാലയം പ്രത്യേകം നിർദ്ദേശിച്ചു. കൃത്യസമയത്ത് അലേർട്ടുകൾ ലഭിക്കുന്നതിന് ഈ അപ്ഡേറ്റ് അത്യാവശ്യമാണെന്ന് അധികൃതർ അറിയിച്ചു.
അതേസമയം, ആൻഡ്രോയിഡ്, ഹുവായ് ഉപകരണങ്ങൾ ഉപയോഗിക്കുന്നവർക്ക് നിലവിൽ പ്രത്യേക മാറ്റങ്ങൾ വരുത്തേണ്ടതില്ല. ഈ ഫോണുകളിലെ സിസ്റ്റം നിലവിൽ തന്നെ എമർജൻസി അലേർട്ട് സംവിധാനവുമായി പൊരുത്തപ്പെടുന്നവയാണെന്ന് മന്ത്രാലയം വ്യക്തമാക്കി.
