മനാമ: തമിഴ്നാട് മുഖ്യമന്ത്രിയുടെ പ്രത്യേക നൈപുണ്യ വികസന പദ്ധതിയായ “നാൻ മുതൽവൻ” സ്കീമിന് കീഴിൽ ബഹ്റൈനിൽ സെമിനാറിനായി എത്തിയ വിദ്യാർത്ഥി സംഘത്തിന് ഭാരതി അസോസിയേഷൻ ഹൃദ്യമായ സ്വീകരണം നൽകി. വിദ്യാർത്ഥികളുടെ ആഗോള സമ്പർക്കവും തൊഴിൽ നൈപുണ്യവും വർദ്ധിപ്പിക്കുക എന്ന ലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്.
ഭാരതി അസോസിയേഷൻ പ്രസിഡന്റ് വല്ലം ബഷീറിന്റെ നേതൃത്വത്തിൽ അഹ്ലിയ യൂണിവേഴ്സിറ്റിയുമായി സഹകരിച്ചാണ് സ്വീകരണ പരിപാടി സംഘടിപ്പിച്ചത്. ചടങ്ങിൽ ഭാരതി അസോസിയേഷൻ ഭാരവാഹികളും അഹ്ലിയ യൂണിവേഴ്സിറ്റി പ്രതിനിധികളും പ്രമുഖ വ്യക്തിത്വങ്ങളും പങ്കെടുത്തു.
സ്വീകരണത്തിന്റെ ഭാഗമായി വിദ്യാർത്ഥികളുമായി നടത്തിയ ആശയസംവാദത്തിൽ അവർ തങ്ങളുടെ പഠനാനുഭവങ്ങളും ഭാവി പ്രതീക്ഷകളും പങ്കുവെച്ചു. വിദ്യാർത്ഥികൾക്ക് വലിയ ആത്മവിശ്വാസവും സാംസ്കാരിക വിനിമയത്തിന് മികച്ച വേദിയും ഒരുക്കാൻ ഈ സംവാദത്തിലൂടെ സാധിച്ചു. തമിഴ് വിദ്യാർത്ഥികളുടെയും യുവാക്കളുടെയും ഉന്നമനത്തിനായി ഭാരതി അസോസിയേഷൻ നടത്തുന്ന പ്രവർത്തനങ്ങളുടെ തുടർച്ചയായിരുന്നു ഈ പരിപാടി.
തമിഴ്നാട് സർക്കാരിന്റെ “നാൻ മുതൽവൻ” പദ്ധതിയെ ഭാരതി അസോസിയേഷൻ അഭിനന്ദിച്ചു. തമിഴ്നാടും ബഹ്റൈനിലെ പ്രവാസി സമൂഹവും തമ്മിലുള്ള ബന്ധം ശക്തമാക്കുന്ന ഇത്തരം വിദ്യാഭ്യാസ-യുവജന കേന്ദ്രീകൃത പദ്ധതികൾക്ക് തുടർന്നും എല്ലാവിധ പിന്തുണയും അസോസിയേഷൻ വാഗ്ദാനം ചെയ്തു.
