മനാമ: കിരീടാവകാശിയും പ്രധാനമന്ത്രിയുമായ ഹിസ് റോയല് ഹൈനസ് പ്രിന്സ് സല്മാന് ബിന് ഹമദ് അല് ഖലീഫ സൗദി അറേബ്യയുടെ കിരീടാവകാശിയും പ്രധാനമന്ത്രിയുമായ ഹിസ് റോയല് ഹൈനസ് പ്രിന്സ് മുഹമ്മദ് ബിന് സല്മാന് ബിന് അബ്ദുല് അസീസ് അല് സൗദുമായി കൂടിക്കാഴ്ച നടത്തി. കിരീടാവകാശിയുടെ സൗദി സന്ദര്ശനത്തിന്റെ ഭാഗമായാണ് കൂടിക്കാഴ്ച നടന്നത്.
ബഹ്റൈനും സൗദി അറേബ്യയും തമ്മിലുള്ള ബന്ധത്തിലെ തുടര്ച്ചയായ പുരോഗതിയും വികാസവും കിരീടാവകാശി കൂടിക്കാഴ്ചയില് എടുത്തുപറഞ്ഞു. ഇരു രാജ്യങ്ങളും തമ്മിലുള്ള ബന്ധത്തിന് രാജാവ് ഹമദ് ബിന് ഈസ അല് ഖലീഫയും സൗദി രാജാവ് സല്മാന് ബിന് അബ്ദുല് അസീസ് അല് സൗദും നല്കുന്ന പിന്തുണയെ കുറിച്ചും കിരീടാവകാശി പറഞ്ഞു.
രണ്ട് രാജ്യങ്ങള് തമ്മിലുള്ള ബന്ധത്തിന്റെ ചരിത്രപരമായ സ്വഭാവം റോയല് ഹൈനസ് സ്ഥിരീകരിച്ചു. ഇത് ആഴമേറിയതും വിശാലവുമായ ബഹുമേഖലാ സഹകരണത്താല് അടിത്തറയിട്ടതാണെന്ന് അദ്ദേഹം കൂട്ടിച്ചേര്ത്തു.
