മനാമ: കുട്ടികളുടെ ബൗദ്ധിക വളർച്ചയും ഏകാഗ്രതയും ലക്ഷ്യമിട്ട് ബഹ്റൈൻ പ്രതിഭ ഗുദൈബിയ യൂണിറ്റും അർജുൻസ് അക്കാദമിയും സംയുക്തമായി സംഘടിപ്പിക്കുന്ന മൂന്ന് മാസത്തെ ചെസ്സ് പരിശീലന ക്യാമ്പിന് തുടക്കമായി. സൽമാനിയയിലെ പ്രതിഭ സെന്ററിൽ വെച്ച് നടന്ന ചടങ്ങിൽ പ്രതിഭ മനാമ മേഖല കമ്മിറ്റി സെക്രട്ടറി രാജേഷ് അറ്റാച്ചേരി ക്യാമ്പ് ഉദ്ഘാടനം ചെയ്തു.
രണ്ട് വിഭാഗങ്ങളിലായി 60 വിദ്യാർത്ഥികളാണ് ഈ ദീർഘകാല പരിശീലന പരിപാടിയിൽ പങ്കെടുക്കുന്നത്. ചെസ്സ് കളിയുടെ അടിസ്ഥാന നിയമങ്ങൾ മുതൽ സങ്കീർണ്ണമായ തന്ത്രങ്ങൾ വരെ പഠിപ്പിക്കുന്നതിനോടൊപ്പം, കുട്ടികളെ ഉയർന്ന തലത്തിലുള്ള മത്സരങ്ങൾക്കായി പ്രാപ്തരാക്കുന്ന രീതിയിലാണ് ക്യാമ്പ് രൂപകൽപ്പന ചെയ്തിരിക്കുന്നത്. ചെസ്സ് പരിശീലനം കുട്ടികളുടെ വിശകലന ചിന്താഗതി, തീരുമാനങ്ങൾ എടുക്കാനുള്ള ശേഷി, ആത്മവിശ്വാസം എന്നിവ വർദ്ധിപ്പിക്കുമെന്ന് ഉദ്ഘാടന പ്രസംഗത്തിൽ രാജേഷ് അറ്റാച്ചേരി ചൂണ്ടിക്കാട്ടി.
പ്രതിഭ ജോയിന്റ് സെക്രട്ടറി നിരൻ സുബ്രഹ്മണ്യൻ ചടങ്ങിൽ ആശംസകൾ നേർന്നു. ക്യാമ്പിന്റെ പ്രവർത്തനരീതികളെക്കുറിച്ചും വരാനിരിക്കുന്ന ലക്ഷ്യങ്ങളെക്കുറിച്ചും അർജുൻസ് അക്കാദമി ഡയറക്ടർ അർജുൻ വിശദീകരിച്ചു.
ഗുദൈബിയ യൂണിറ്റ് പ്രസിഡന്റ് ഷനിൽ കുമാർ അധ്യക്ഷത വഹിച്ച ചടങ്ങിൽ യൂണിറ്റ് സെക്രട്ടറി മനോജ് പോൾ സ്വാഗതവും, മേഖല വൈസ് പ്രസിഡന്റ് സരിത കുമാർ നന്ദിയും രേഖപ്പെടുത്തി. കുട്ടികളിലെ ആരോഗ്യകരമായ മത്സരമനോഭാവം വളർത്തുന്നതിനും ഭാവിയിലെ മികച്ച പ്രതിഭകളെ കണ്ടെത്തുന്നതിനുമായി ഇത്തരം ദീർഘകാല പദ്ധതികൾ തുടരുമെന്ന് സംഘാടകർ അറിയിച്ചു.
