മനാമ: മുഹറഖില് ഒരു ദേശീയ സ്റ്റേഡിയം നിര്മ്മിക്കാനുള്ള നിര്ദ്ദേശത്തിന് എംപിമാര് അംഗീകാരം നല്കി. ഗവര്ണറേറ്റില് കായിക സൗകര്യങ്ങളുടെ അഭാവം ചൂണ്ടിക്കാട്ടിയാണ് അംഗീകാരം. ഖാലിദ് സാലിഹ് ബുവാനഖ്, ഹിഷാം അബ്ദുല് അസീസ് അല് അവാദി എന്നിവരുള്പ്പെടെയുള്ള എംപിമാരാണ് നിര്ദേശം സമര്പ്പിച്ചത്.
120,000 ത്തിലധികം ആളുകള് താമസിക്കുന്ന മുഹറഖില് ദേശീയ തലത്തിലുള്ള പരിപാടികള്ക്കായി പൂര്ണ്ണമായും സജ്ജീകരിച്ച ഒരു വേദി ഇല്ലെന്ന് എംപിമാര് നിര്ദേശത്തില് പറഞ്ഞു. സ്പോര്ട്സ് അടിസ്ഥാന സൗകര്യങ്ങള് വികസിപ്പിക്കുന്നത് വിശാലമായ മേഖലാ വികസനത്തിന്റെ ഭാഗമാണെന്ന് എംപി അബ്ദുള്ഹക്കീം അല് ഷെനോ അഭിപ്രായപ്പെട്ടു.
അതേസമയം, ജനസംഖ്യാ വളര്ച്ചയും നിലവിലുള്ള സൗകര്യങ്ങളിലെ തിരക്കും കണക്കിലെടുത്ത് ബുസൈതീനില് ഒരു പുതിയ ആരോഗ്യ കേന്ദ്രം സ്ഥാപിക്കുന്നതിനുള്ള നിര്ദ്ദേശവും പാര്ലമെന്റ് അംഗീകരിച്ചു. നിരവധി താമസക്കാര് നിലവില് അടിയന്തര പരിചരണത്തിനായി കിംഗ് ഹമദ് യൂണിവേഴ്സിറ്റി ആശുപത്രിയെ ആശ്രയിക്കുന്നുണ്ടെന്നും, പലപ്പോഴും ആറ് മുതല് എട്ട് മണിക്കൂര് വരെ കാത്തിരിക്കേണ്ടി വരുന്നുണ്ടെന്നും എംപി അബ്ദുല്വാഹിദ് അബ്ദുല് അസീസ് ഖരാത്ത ചൂണ്ടിക്കാട്ടി.
അല് ഹസന് പള്ളിക്ക് സമീപം ഭൂമി അനുവദിച്ചിട്ടുള്ളതിനാല് വരാനിരിക്കുന്ന സംസ്ഥാന ബജറ്റില് പദ്ധതി ഉള്പ്പെടുത്താന് സര്വീസസ് കമ്മിറ്റി ശുപാര്ശ ചെയ്തു. കൂടാതെ ഭക്ഷ്യസുരക്ഷയ്ക്കായുള്ള സുപ്രീം കൗണ്സില് സ്ഥാപിക്കുന്നതിനും നിയമസഭാംഗങ്ങള് അംഗീകാരം നല്കി.
