മനാമ: ബഹ്റൈനില് നടപ്പാക്കാന് പോകുന്ന മെട്രോ, നിലവിലുള്ള ബസ് റൂട്ടുകളുമായും സൈക്കിള് പാതകളുമായും സംയോജിപ്പിക്കുമെന്ന് ഗതാഗത-വാര്ത്താവിനിമയ മന്ത്രി ഷെയ്ഖ് അബ്ദുള്ള ബിന് അഹമ്മദ് അല് ഖലീഫ അറിയിച്ചു. ആദ്യ മെട്രോ റൂട്ടിന്റെ നിര്മ്മാണ പ്രവര്ത്തനങ്ങള് പുരോഗമിക്കുന്നതിനൊപ്പം രാജ്യത്ത് ബസ് യാത്രക്കാരുടെ എണ്ണത്തില് വലിയ വര്ധനവ് രേഖപ്പെടുത്തുന്ന പശ്ചാത്തലത്തിലാണ് ഈ നീക്കം.
എംപി ഡോ. മുനീര് സറൂറിന്റെ ചോദ്യങ്ങള്ക്ക് രേഖാമൂലം നല്കിയ മറുപടിയിലാണ് മന്ത്രി ഇക്കാര്യങ്ങള് വ്യക്തമാക്കിയത്. 2023-ല് പൊതു ബസ് ഉപയോഗം 17 ശതമാനവും 2024-ല് 1 ശതമാനവും 2025-ല് 3 ശതമാനവും വര്ദ്ധിച്ചതായി മന്ത്രി പറഞ്ഞു. കഴിഞ്ഞ വര്ഷം മാത്രം ആകെ യാത്രക്കാരുടെ എണ്ണം 12.1 ദശലക്ഷത്തില് എത്തി.
വരും വര്ഷങ്ങളില് കൂടുതല് ബോധവല്ക്കരണ പരിപാടികളിലൂടെയും ശൃംഖലയുടെ വിപുലീകരണത്തിലൂടെയും കൂടുതല് ആളുകളെ പൊതുഗതാഗതത്തിലേക്ക് ആകര്ഷിക്കാന് മന്ത്രാലയം ലക്ഷ്യമിടുന്നു. വിപുലമായ പൊതുഗതാഗത ശൃംഖല നിലവില് വരുന്നതോടെ റോഡുകളിലെ തിരക്ക്, പ്രത്യേകിച്ച് തിരക്കേറിയ സമയങ്ങളിലും അവധി ദിനങ്ങളിലും ഗണ്യമായി കുറയുമെന്ന് ഷെയ്ഖ് അബ്ദുള്ള പറഞ്ഞു.
‘ബഹ്റൈന് മെട്രോ പദ്ധതി ഈ ലക്ഷ്യത്തിലേക്കുള്ള പ്രധാന ചുവടുവെപ്പാണ്. വിമാനത്താവളത്തെ വാണിജ്യ, താമസ, വിദ്യാഭ്യാസ മേഖലകളുമായി ബന്ധിപ്പിക്കുന്നതിലൂടെ കൂടുതല് യാത്രക്കാരെ ഉള്ക്കൊള്ളാന് ഈ ശൃംഖലയ്ക്ക് സാധിക്കും,’ അദ്ദേഹം വ്യക്തമാക്കി. നിലവില് ഒന്നാം ഘട്ടത്തിന്റെ റൂട്ട് തയ്യാറാക്കുന്ന ജോലികള് പുരോഗമിക്കുകയാണ്. നിര്മ്മാണം ആരംഭിക്കുന്നതിന് മുന്പ് ബന്ധപ്പെട്ട എല്ലാ വകുപ്പുകളുമായും ചേര്ന്ന് കൃത്യമായ ആസൂത്രണം ആവശ്യമാണെന്നും അദ്ദേഹം കൂട്ടിച്ചേര്ത്തു.
മെട്രോ സംവിധാനം ബസുകളുമായും സൈക്കിള് പാതകളുമായും ബന്ധിപ്പിക്കുന്നതിലൂടെ യാത്രാസമയം കുറയ്ക്കാനും സ്വകാര്യ വാഹനങ്ങളെ ആശ്രയിക്കുന്നത് ഒഴിവാക്കാനും സാധിക്കും. ഇത് കൂടുതല് വൃത്തിയുള്ളതും കാര്യക്ഷമവുമായ ഒരു ഗതാഗത സംവിധാനത്തിലേക്കുള്ള ബഹ്റൈന്റെ മാറ്റത്തിന് കരുത്തുപകരും.
