ബിസിനസിലും ജീവകാരുണ്യ രംഗത്തും മികച്ച പ്രവർത്തനം നടത്തിയതിന് ബഹ്റൈൻ മലയാളിക്ക് പ്രവാസി ഭാരതീയ പുരസ്കാരം. സാമൂഹിക പ്രവർത്തന രംഗത്തും വ്യവസായത്തിലും തന്റേതായ വ്യക്തിമുദ്ര പതിപ്പിച്ച പ്രവാസിയായ ഡോ. വി.ടി വിനോദിനാണ് പ്രവാസി ഭാരതീയ പുരസ്കാരം ലഭിച്ചത്. ബഹ്റൈനിൽ പ്രവർത്തിക്കുന്ന അൽ ഹിലാൽ ഗ്രൂപ്പിന്റെ ഡയറക്ടറാണ് ഡോ. വി.ടി വിനോദ്. ബഹ്റൈൻ റെസിഡെൻഷ്യൽ വിസയുള്ള ഇദ്ദേഹത്തിന് ഒമാനിൽ നിന്നുള്ള നോമിനേഷലിലാണ് പുരസ്കാരം ലഭിച്ചത്. രാഷ്ട്രപതിയാണ് പുരസ്കാരദാനം നിർവഹിക്കുക. അവാർഡ് ജേതാക്കളുടെ ഔദ്യോഗിക പ്രഖ്യാപനം വൈകിട്ടുണ്ടാകും.
ഗൾഫ് മേഖലയിലെ പ്രമുഖ ആതുര സ്ഥാപനമായ ബദർ അൽ സമയുടെ മാനേജിങ് ഡയറക്ടറാണ് ഡോ.വി.ടി വിനോദ്. മാർസ് ഇന്റർനാഷനൽ ഉൾപ്പെടെ നിരവധി സ്ഥാപനങ്ങളിലും വി.ടി വിനോദിന് പങ്കാളിത്തമുണ്ട്. അവാർഡ് ലഭിച്ചതിൽ ആഹ്ലാദമുണ്ടെന്ന്
വിനോദ് പറഞ്ഞു. മുഖ്യമന്ത്രി പിണറായി വിജയന്റെ സാമ്പത്തിക ഉപദേഷ്ടാവ് ഗീതാ ഗോപിനാഥും പ്രവാസി പുരസ്കാര പട്ടികയിൽ ഇടം പിടിച്ചു. യു.എ.ഇയിൽ നിന്ന് സുലേഖാ ഹോസ്പിറ്റൽ ഉടമ ഡോ. സുലേഖ ഉൾപ്പെടെ അഞ്ചു പേരാണ് പ്രവാസി പുരസ്കാര ലിസ്റ്റിലുള്ളത്.
