രണ്ടാം മോദി സർക്കാർ സത്യപ്രതിജ്ഞ നാളെ; മന്ത്രിമാരെ ഇന്ന് രാത്രിയോടെ തീരുമാനിക്കും

ഡൽഹി: നരേന്ദ്രമോദിയുടെ നേതൃത്വത്തിലുള്ള രണ്ടാം സർക്കാർ നാളെ രാഷ്ട്രപതിഭവനിൽ വെച്ച് സത്യപ്രതിജ്ഞ ചെയ്യും. 2014 ലേതിനെക്കാള്‍ വിപുലമായ സത്യപ്രതിജ്ഞാ ചടങ്ങാവും ഇത്തവണ നടക്കുക. ആരൊക്കെ മന്ത്രിമാരാകും എന്ന കാര്യത്തിൽ ഇന്ന് രാത്രിയോടെ തീരുമാനമാകും. ബിജെപി അദ്ധ്യക്ഷൻ അമിത് ഷായും നരേന്ദ്രമോദിയും ഇന്നലെ കൂടിക്കാഴ്ച നടത്തിയിരുന്നു. അമിത് ഷാ മന്ത്രിയാകുമെന്ന അഭ്യൂഹങ്ങളോട് ബിജെപി ഇതുവരെ പ്രതികരിച്ചിട്ടില്ല.

സത്യപ്രതിജ്ഞ ചടങ്ങിന് പാകിസ്ഥാൻ ഒഴികെയുള്ള അയൽ രാജ്യങ്ങളിലെ നേതാക്കളെ ക്ഷണിച്ചിട്ടുണ്ട്. പശ്ചിമബംഗാൾ മുഖ്യമന്ത്രി മമതാ ബാനർജി സത്യപ്രതിജ്ഞ ചടങ്ങിൽ പങ്കെടുക്കാൻ ഇന്ന് ദില്ലിയിൽ എത്തും. ബിംസ്റ്റെക് കൂട്ടായ്മയിലെ രാഷ്ട്രത്തലവൻമാർക്ക് സത്യപ്രതിജ്ഞാചടങ്ങിലേക്ക് ക്ഷണമുണ്ട്. ബംഗ്ലാദേശ്, മ്യാൻമർ, ശ്രീലങ്ക, തായ്‍ലൻഡ്, നേപ്പാൾ, ഭൂട്ടാൻ എന്നീ രാജ്യങ്ങളുടെ തലവൻമാരെയാണ് ചടങ്ങിലേക്ക് ക്ഷണിച്ചിരിക്കുന്നത്.