ബഹ്റൈനിൽ 371 പേർക്ക് കൂടി കോവിഡ് മുക്തി, 208 പുതിയ കേസുകൾ; ചികിത്സയിലുള്ള രോഗികളുടെ എണ്ണം 2832 ആയി കുറഞ്ഞു

മനാമ: ബഹ്‌റൈനില്‍ കോവിഡ്-19 ബാധിതരായ 371 പേര്‍ കൂടി രോഗ മുക്തരായി. ഇതോടെ രാജ്യത്ത് ആകെ രോഗമുക്തരായവരുടെ എണ്ണം 38211 ആയി ഉയർന്നു. അതേസമയം ആഗസ്ത് 1 ന് 24 മണിക്കൂറിനിടെ 4569 പേരിൽ നടത്തിയ പരിശോധനയിൽ പുതുതായി 208 പേര്‍ക്ക് മാത്രമാണ് പുതുതായി രോഗം സ്ഥിരീകരിച്ചത്. ഇവരില്‍ 75 പേര്‍ പ്രവാസി തൊഴിലാളികളാണ്. മറ്റുള്ളവർക്ക് സമ്പര്‍ക്കത്തിലൂടെയും വിദേശത്ത് നിന്ന് എത്തിയത് വഴിയുമാണ് രോഗം പകര്‍ന്നിരിക്കുന്നത്. ഈദ് ദിനങ്ങളിൽ പരിശോധനകളുടെ എണ്ണം താരതമ്യേന കുറവായതിനാൽ തന്നെ പുതിയ രോഗബാധിതരുടെ എണ്ണത്തിലും കുറവ് വന്നിട്ടുണ്ട്.

നിലവില്‍ 2832 പേരാണ് രാജ്യത്ത് കോവിഡ്-19 ബാധിച്ച് ചികിത്സയില്‍ കഴിയുന്നത്. ചികിത്സയിലുള്ളവരിൽ 43 പേരുടെ ആരോഗ്യനില ഗുരുതരമായി തുടരുകയാണ്. ഇന്നലെ മരണങ്ങളൊന്നും തന്നെ റിപ്പോർട്ട് ചെയ്യപ്പെടാത്തത് ആശ്വാസ വാർത്തയായി. 147 പേർക്കാണ് ആകെ രാജ്യത്ത് വൈറസ് ബാധയിൽ ജീവൻ നഷ്ടമായത്. ഇതുവരെ 835567 പേരെ രാജ്യത്ത് പരിശോധനകൾക്ക് വിധേയമാക്കിയിട്ടുണ്ട്. ബലി പെരുന്നാൾ അവധി ദിനങ്ങളിൽ ജനങ്ങൾ വീടുകളിൽ തന്നെ കഴിച്ച് കൂട്ടാനും സമ്പർക്കങ്ങൾക്ക് ഇടവരുത്താതിരിക്കാനും ജാഗ്രത പാലിക്കണമെന്ന് ആരോഗ്യ മന്ത്രാലയം നിർദ്ദേശിച്ചു.