മനാമ: ഇന്ത്യൻ അംബാസഡർ പീയൂഷ് ശ്രീവാസ്തവ ലുലു ഹൈപ്പർമാർക്കറ്റിന്റെ ഇന്ത്യൻ റിപ്പബ്ലിക് ദിനാഘോഷവുമയി ബന്ധപ്പെട്ട വ്യാപാര മേള കഴിഞ്ഞ ദിവസം ഡാന മാളിൽ ഉദ്ഘാടനം ചെയ്തു.
ഇന്ത്യൻ ഭക്ഷണം, ഫാഷൻ, സംസ്കാരം എന്നിവയുടെ ഉത്സവത്തിൽ ഫെബ്രുവരി 6 വരെ ഇന്ത്യൻ ഉൽ‌പ്പന്നങ്ങൾ മികച്ച ഓഫറുകളോടെ അവതരിപ്പിക്കുന്നു.
ബഹ്റൈനിലെ ഭക്ഷ്യവസ്തുക്കളുടെ പ്രധാന വിതരണക്കാരിൽ ഒന്നാണ് ഇന്ത്യ. ഇന്ത്യൻ റിപ്പബ്ലിക് ദിനാഘോഷവുമായി ബന്ധപ്പെട്ട്, ഫെബ്രുവരി 6 വരെ, ഇന്ത്യൻ ബസുമതി, ധാന്യങ്ങൾ, അച്ചാറുകൾ, ലഘുഭക്ഷണങ്ങൾ, ‘റെഡി-ടു-ഈറ്റ്’ പ്രോസസ് ചെയ്ത ഭക്ഷണങ്ങൾ എന്നിവ പ്രത്യേക ഓഫറിൽ ലഭ്യമാണ്.
ആവേശകരമായ പ്രത്യേക വിലയിൽ, വർണ്ണാഭമായ ഇന്ത്യൻ ഫാഷൻ ഉത്പന്നങ്ങളും ലുലു പ്രദർശിപ്പിക്കുന്നു.
ഈ വർഷത്തെ ഒരു പ്രധാന ആകർഷണം, ഉയർന്ന നിലവാരമുള്ള കശ്മീരി ഉൽ‌പ്പന്നങ്ങളാണ്. കാശ്മീരിൽ നിന്നുള്ള ആപ്പിൾ, കുങ്കുമം എന്നിവക്ക് ബഹ്റൈനിൽ ആവശ്യക്കാരേറെയാണ്.
ഇന്ത്യൻ അംബാസഡർ ശ്രീവാസ്തവ ഹൈപ്പർമാർക്കറ്റ് ചുറ്റിക്കണ്ടു. ഇന്ത്യയുടെ വൈവിധ്യമാർന്ന സംസ്കാരത്തെ പരിചയപ്പെടുത്തുന്ന വിവിധ ഉൽപ്പന്നങ്ങളിൽ അദ്ദേഹം സന്തോഷം പ്രകടിപ്പിച്ചു.
“72-ാമത് റിപ്പബ്ലിക് ദിനാഘോഷത്തിന്റെ ഭാഗമായി ഡാന മാളിലെ ലുലു ഹൈപ്പർ മാർക്കറ്റിൽ ഇന്ത്യൻ ഉത്സവം ഉദ്ഘാടനം ചെയ്യുന്നതിൽ ഞാൻ സന്തുഷ്ടനാണ്,മിഡിൽ ഈസ്റ്റിലെ ഏറ്റവും വലിയ ഹൈപ്പർമാർക്കറ്റ് ശൃംഖലയാണ് ലുലു, ഇന്ത്യൻ ഉൽ‌പ്പന്നങ്ങളും ഭക്ഷണവും ഉയർത്തിക്കാട്ടുന്ന ഈ വാർ‌ഷിക ഉത്സവം സംഘടിപ്പിച്ചതിന് ലുലു ഗ്രൂപ്പിനെ ഞാൻ അഭിനന്ദിക്കുന്നു.എല്ലാ കോവിഡ് പ്രോട്ടോക്കോളുകളും മാനദണ്ഡങ്ങളും പാലിച്ച് ലുലു വാരാന്ത്യത്തിൽ ഫുഡ് ഫെസ്റ്റിവൽ സംഘടിപ്പിക്കുന്നുവെന്നറിഞ്ഞതിൽ എനിക്ക് സന്തോഷമുണ്ട്.” അദ്ദേഹം പറഞ്ഞു.
ഇന്ത്യൻ റിപ്പബ്ലിക് ദിനം തങ്ങളുടെ ഉപഭോക്താക്കൾക്ക് വളരെ പ്രിയപ്പെട്ടതാണെന്നും, അവർക്കായി തങ്ങൾ ഒരുക്കിയിരിക്കുന്ന ഈ സവിശേഷ വിപണന മേള അവർ ആസ്വദിക്കുമെന്നും,
ഇന്ത്യയുടെ വികസിച്ചുകൊണ്ടിരിക്കുന്ന ഉൽപ്പന്ന ശ്രേണി ഉപഭോക്താക്കൾക്ക് ചില പുതിയ അഭിരുചികൾ നൽകുന്നു എന്നും യോഗത്തിൽ ലുലു ഗ്രൂപ്പ് ഡയറക്ടർ ജുസർ രൂപാവാല പറഞ്ഞു.
