മനാമ: ബഹ്റൈൻ കേരളീയസമാജം ഫിലിം ക്ലബ് ആഭിമുഖ്യത്തിൽ ചിത്രീകരിച്ച ഒരുമണിക്കൂർ ദൈർഘ്യമുള്ള ഫീച്ചർ ഫിലിം ‘നിയതം’ റിലീസിങ്ങിന് ഒരുങ്ങുന്നു.
തൃശൂരിലെ ദേവസൂര്യ കലാവേദി ആൻഡ് പബ്ലിക് ലൈബ്രറി മാർച്ച് 12 മുതൽ 14വരെ സംഘടിപ്പിക്കുന്ന അഞ്ചാമത് ഗ്രാമീണ ചലച്ചിത്രോത്സവത്തിൽ ഉദ്ഘാടന ചിത്രമായി ‘നിയതം’ പ്രദർശിപ്പിക്കും.
റിലീസിങ്ങിന് മുന്നോടിയായി ചലച്ചിത്രത്തിൻ്റെ ടീസർ റിലീസിങ് ഞായറാഴ്ച വൈകീട്ട് ഏഴിന് ബഹ്റൈൻ കേരളീയ സമാജം ഫേസ്ബുക്ക് പേജിലൂടെ പ്രസിഡൻറ് പി.വി. രാധാകൃഷ്ണപിള്ള നിർവഹിക്കും. കോവിഡ് കാലത്തെ പ്രവാസികളുടെ ബുദ്ധിമുട്ടുകളും മനോസംഘർഷങ്ങളും കുടുംബപശ്ചാത്തലവും കോർത്തിണക്കി ഒരുക്കിയ ഈ ചിത്രത്തിൻ്റെ കഥയും തിരക്കഥയും സംവിധാനവും നിർവഹിച്ചിരിക്കുന്നത് രാജേഷ് സോമൻ പുവ്വത്തൂർ ആണ്. ജീവൻ പത്മനാഭൻ ഛായാഗ്രഹണം നിർവഹിച്ച ഒരുമണിക്കൂർ ദൈർഘ്യമുള്ള സിനിമ പൂർണമായും കോവിഡ് പ്രോട്ടോകോൾ പാലിച്ച് ബഹ്റൈനിലാണ് ചിത്രീകരിച്ചത്.
ബഹ്റൈനിൽ കലാരംഗത്ത് സജീവമായി പ്രവർത്തിക്കുന്ന മനോഹരൻ പാവറട്ടി, വിനോദ് അലിയത്ത്, ബിനോജ് പാവറട്ടി, ഉണ്ണി എന്നിവരാണ് ചിത്രത്തിൽ മുഖ്യവേഷങ്ങൾ അവതരിപ്പിക്കുന്നത്.