മനാമ: സ്വയംഭരണ സംവിധാനം പ്രാഥമിക ആരോഗ്യകേന്ദ്രങ്ങളെ കൂടുതൽ ശക്തിപ്പെടുത്തുമെന്ന് പ്രൈമറി ഹെൽത് സെൻററുകൾക്കായുള്ള സി.ഇ.ഒ ഡോ. ജലീല അൽ സായിദ് വാർത്തസമ്മേളനത്തിൽ പറഞ്ഞു. കാര്യക്ഷമതയും ഉയർന്ന നിലവാരവുമുള്ള ആരോഗ്യ സേവനങ്ങൾ നൽകുകയാണ് പദ്ധതിയുടെ ലക്ഷ്യം. പ്രഥമശുശ്രൂഷയെ അടിസ്ഥാനമാക്കിയ ആരോഗ്യസംവിധാനത്തെ പ്രോത്സാഹിപ്പിക്കാനും രോഗികൾക്ക് കൂടുതൽ ചികിത്സാസാധ്യതകൾ ഒരുക്കാനും ‘ഫാമിലി മെഡിസിൻ’ രീതിയുടെ ആനുകൂല്യം പ്രയോജനപ്പെടുത്താനും സ്വയംഭരണ സംവിധാനത്തിലൂടെ സാധിക്കും.
ഇതിനു പുറമേ, നാഷനൽ ഹെൽത് ഇൻഷുറൻസ് പദ്ധതിയുടെ കീഴിൽ ആരോഗ്യ പരിരക്ഷ ശൃംഖലകൾ സ്ഥാപിക്കുമെന്നും ഹെൽത് സെൻററുകളുടെ നിലവിലെ സ്ഥിതി വിലയിരുത്തിയതായും ജലീല അൽ സായിദ് പറഞ്ഞു. മന്ത്രിസഭ അംഗീകരിച്ച ദേശീയ ആരോഗ്യപദ്ധതിക്ക് അനുസൃതമായി സ്വയംഭരണ സംവിധാനത്തിന് കർമപദ്ധതി തയാറാക്കിയതായും ജലീല അൽ സായിദ് പറഞ്ഞു.
പദ്ധതി ആരംഭിച്ച് ഒരു വർഷം പിന്നിട്ടപ്പോൾ വിട്ടുമാറാത്ത രോഗങ്ങൾ കണ്ടെത്തുന്നതിൽ വർധനയുണ്ടായതായി ഡോ. ജലീല അൽ സായിദ് പറഞ്ഞു. ഉയർന്ന രക്തസമ്മർദം,പ്രമേഹം, സ്തനാർബുദം , കാൻസർ, കൊളസ്ട്രോൾ, വൃക്കരോഗം, നേത്രരോഗം തുടങ്ങിയവ ഈ കാലയളവിൽ കണ്ടെത്തിയതായും ജലീല പറഞ്ഞു. പ്രാഥമികാരോഗ്യ കേന്ദ്രങ്ങളിലെ ജീവനക്കാരുടെ എണ്ണം 2,231 ആയതായും സി.ഇ.ഒ പറഞ്ഞു. 465 ഡോക്ടർമാർ, 566 നഴ്‌സുമാർ, 813 അനുബന്ധ ജീവനക്കാർ, 292 അഡ്മിനിസ്ട്രേറ്റർമാർ എന്നിവർ ഉൾപ്പെടെയാണിത്. നിലവിൽ രാജ്യത്തെ ഒമ്പത് ഹെൽത് സെൻററുകൾ 24 മണിക്കൂറും പ്രവർത്തിക്കുന്നുണ്ട്. ഹെൽത് സെൻററുകളെ ആശ്രയിക്കുന്നവരുടെ എണ്ണം കഴിഞ്ഞ വർഷത്തെ അപേക്ഷിച്ച് 2021ൽ 36 ശതമാനം വർധിച്ചതായും ജലീല അൽ സായിദ് പറഞ്ഞു.
