മനാമ: ഉപപ്രധാനമന്ത്രി ശൈഖ് ഖാലിദ് ബിൻ അബ്ദുല്ല അൽ ഖലീഫ ബഹ്റൈനിലെ ഇന്ത്യൻ അംബാസഡർ പീയൂഷ് ശ്രീവാസ്തവയുമായി കൂടിക്കാഴ്ച നടത്തി. കോവിഡ് മഹാമാരി നേരിടുന്നതിൽ ഇരുരാജ്യങ്ങളും തമ്മിലുള്ള സഹകരണം അവലോകനം ചെയ്തു.
ബഹ്റൈനും ഇന്ത്യയും തമ്മിലുള്ള ചരിത്രപരമായ ബന്ധങ്ങളെയും വിവിധ മേഖലകളിലെ പുരോഗതിയെയും ഉപപ്രധാനമന്ത്രി പ്രശംസിച്ചു. ബഹ്റൈൻ-ഇന്ത്യൻ ബന്ധം കൂടുതൽ ശക്തിപ്പെടുത്തുന്നതിന് അംബാസഡർ വിജയിക്കട്ടെയെന്നും അദ്ദേഹം ആശംസിച്ചു.
ഇരുരാജ്യങ്ങളും തമ്മിലുള്ള സഹകരണം കൂടുതൽ വിപുലമാക്കുന്നതിൽ താത്പര്യവും അദ്ദേഹം പ്രകടിപ്പിച്ചു. ഉഭയകക്ഷി ബന്ധത്തിന് നൽകുന്ന പിന്തുണക്ക് അംബാസഡർ ഉപപ്രധാനമന്ത്രിക്ക് നന്ദി പറഞ്ഞു.