മനാമ: സിറ്റി ഗ്രൂപ്പിന്റെ ബഹ്റൈനിലെ കൺസ്യൂമർ ബിസിനസ് അഹ്ലി യുനൈറ്റഡ് (എ.യു.ബി) ബാങ്ക് ഏറ്റെടുക്കുന്നു. ഇതുസംബന്ധിച്ച കരാറിൽ കഴിഞ്ഞ ദിവസം ഒപ്പുവെച്ചു. റെഗുലേറ്ററി അംഗീകാരത്തിന് വിധേയമായാണ് കരാർ നടപ്പിൽ വരുക.
റീട്ടെയ്ൽ ബാങ്കിങ്, ക്രെഡിറ്റ് കാർഡ് സേവനം, സിറ്റി ബഹ്റൈന്റെ അൺസെക്വേർഡ് വായ്പാ ബിസിനസുകൾ എന്നിവയാണ് അഹ്ലി യുനൈറ്റഡ് ബാങ്ക് ഏറ്റെടുക്കുന്നത്. കരാർ പ്രാബല്യത്തിൽ വരുന്നതോടെ സിറ്റിയുടെ റീട്ടെയ്ൽ ഡിവിഷൻ ടീമിനും അനുബന്ധ ജീവനക്കാർക്കും അഹ്ലി യുനൈറ്റഡ് ബാങ്ക് തൊഴിൽ വാഗ്ദാനം ചെയ്യും.
സിറ്റിയുടെ കൺസ്യൂമർ ബിസിനസ് ഏറ്റെടുക്കുന്നതിലൂടെ ലഭിക്കുന്ന അവസരങ്ങൾ വളരെ വലുതാണെന്ന് എ.യു.ബി റീട്ടെയ്ൽ ബാങ്കിങ് ഡെപ്യൂട്ടി ഗ്രൂപ് ചീഫ് എക്സിക്യൂട്ടിവ് ഓഫിസർ സുവ്രാത് സൈഗാൾ പറഞ്ഞു. വിപണിയിലെ നേതൃസ്ഥാനം നിലനിർത്താൻ സിറ്റിയുടെ ഉൽപന്നങ്ങളും ജീവനക്കാരും സഹായിക്കുമെന്നും അദ്ദേഹം കൂട്ടിച്ചേർത്തു. ബഹ്റൈനിലെ കൺസ്യൂമർ ബാങ്കിങ് രംഗത്തെ പ്രമുഖരായ എ.യു.ബിയുമായുള്ള സഹകരണത്തിൽ സന്തോഷമുണ്ടെന്ന് സിറ്റി കൺട്രി ഓഫിസർ മൈക്കൽ സവായ പറഞ്ഞു. മത്സരാധിഷ്ഠിത ലേലനടപടിയിലൂടെയാണ് അഹ്ലി യുനൈറ്റഡ് ബാങ്കിനെ സിറ്റി തെരഞ്ഞെടുത്തത്. ഈ വർഷം രണ്ടാം പാദത്തിൽ ഏറ്റെടുക്കൽ പൂർണമാകുമെന്നാണ് പ്രതീക്ഷിക്കുന്നത്.”