മനാമ: പ്രമുഖ ഇന്ത്യൻ വിമാനക്കമ്പനിയായ ഇൻഡിഗോ എയർലൈൻസ് ആഗസ്റ്റ് രണ്ട് മുതൽ ബഹ്റൈനിൽനിന്ന് സർവീസ് ആരംഭിക്കുമെന്ന് വാർത്ത. ഇതിനോടകം തന്നെ ഇന്ത്യയിലെ വിവിധ വിമാനത്താവളങ്ങളിലേക്കും ആഴ്ചയിൽ എല്ലാ ദിവസവുമുള്ള ബുക്കിങ് ആരംഭിച്ചു കഴിഞ്ഞതായാണ് സ്ഥിരീകരണം. മുംബൈ വഴിയാകും ഇന്ത്യയിലേക്കുള്ള എല്ലാ സർവീസുകളും നടത്തുക. മുംബൈയിൽനിന്ന് ഇൻഡിഗോ ആഭ്യന്തര സർവീസ് നടത്തുന്ന എല്ലാ വിമാനത്താവളങ്ങളിലേക്കും നിലവിൽ ബഹ്റൈനിൽനിന്ന് ടിക്കറ്റ് ബുക്ക് ചെയ്യാൻ കഴിയുന്നുണ്ട്.
മുംബൈ എയർപോർട്ടിൽ ഇറങ്ങി ടെർമിനൽ ഒന്നിൽ നിന്ന് രണ്ടിലെത്തിയാണ് ആഭ്യന്തര റൂട്ടുകളിലേക്ക് യാത്ര ചെയ്യേണ്ടത്. ടെർമിനൽ മാറിക്കയറാൻ എയർലൈൻസിൻറെ ബസ് ഷട്ടിൽ സർവീസ് നടത്തും. സാധാരണ ട്രാൻസിറ്റ് യാത്ര പോലെ തന്നെ യാത്രക്കാർ ഹാൻഡ് ബാഗേജ് മാത്രം കൈവശം എടുത്താൽ മതിയാകും. ചെക്ക് ഇൻ ബാഗേജ് എയർലൈൻസ് തന്നെ ആഭ്യന്തര വിമാനത്തിൽ കയറ്റും.
കേരളത്തിൽ നിന്നുള്ളവർക്ക് കോഴിക്കോട്, കൊച്ചി, കണ്ണൂർ, തിരുവനന്തപുരം എന്നിങ്ങനെ നാല് വിമാനത്താവളങ്ങളിലേക്കും ടിക്കറ്റ് ബുക്ക് ചെയ്യാൻ സാധിക്കും. കോഴിക്കോട്ടേക്കുള്ള യാത്രക്കാർക്ക് മുബൈയിൽ അഞ്ച് മണിക്കൂർ 10 മിനിറ്റ് കാത്തിരിപ്പുണ്ട്. അതേസമയം, കൊച്ചിയിലേക്കുള്ള യാത്രക്കാർക്ക് മൂന്ന് മണിക്കൂർ 15 മിനിറ്റാണ് കാത്തിരിപ്പ് സമയം. മറ്റ് സ്ഥലങ്ങളിലേക്കും സമാന രീതിയിൽ കാത്തിരിപ്പ് സമയമുണ്ടാകും. ഇന്ത്യയിൽനിന്ന് ബഹ്റൈനിലേക്ക് വരുമ്പോൾ മുംബൈയിലായിരിക്കും യാത്രക്കാരുടെ എമിഗ്രേഷൻ നടപടികൾ പൂർത്തിയാക്കുക.
ബഹ്റൈനിൽനിന്നുള്ള യാത്രക്കാരന് 30 കിലോയാണ് ചെക്ക് ഇൻ ലഗേജ് അനുവദിക്കുന്നത്. തുടർന്ന് ആഭ്യന്തര വിമാനത്തിൽ യാത്ര ചെയ്യുമ്പോഴും ഇതേ തൂക്കം തന്നെ അനുവദിക്കും. ആഗസ്റ്റ് രണ്ടിന് ബഹ്റൈനിൽനിന്ന് കോഴിക്കോട്ടേക്കും കൊച്ചിയിലേക്കും പുറപ്പെടുന്ന വിമാനങ്ങളിൽ 67 ദിനാറാണ് ടിക്കറ്റ് നിരക്ക്. ടിക്കറ്റ് നിരക്ക് കുതിച്ചുയരുന്ന സാഹചര്യത്തിൽ പ്രവാസികൾക്ക് വളരെയധികം ആശ്വാസം പകരുന്ന നിരക്കാവും ഇത്. ബഹ്റൈനിൽനിന്ന് പുലർച്ചെ ഒരു മണിക്ക് പുറപ്പെടുന്ന വിമാനം ഉച്ചക്ക് 2.15ന് കോഴിക്കോട്ടേത്തും. കോഴിക്കോട് നിന്ന് ഉച്ചക്ക് 2.50ന് പുറപ്പെട്ട് രാത്രി 11.35ന് ബഹ്റൈനിൽ എത്തുന്ന വിധമാണ് സമയം ക്രമീകരിച്ചിരിക്കുന്നത്.
