മനാമ: കർണാടക കൾചറൽ ഫൗണ്ടേഷൻ (കെ.സി.എഫ്) ‘മുത്ത് നബി മാനവികതയുടെ മഹാനായകൻ’ പ്രമേയത്തിൽ മീലാദ് കാമ്പയിനിന്റെ ഭാഗമായി നടത്തുന്ന ഗ്രാൻഡ് മീലാദ് സമ്മേളനം വ്യാഴാഴ്ച മനാമ പാകിസ്താൻ ക്ലബിൽ നടക്കുമെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു. രാത്രി എട്ടിന് സ്വലാത്ത്, മൗലിദ് മജ്ലിസോടെ ആരംഭിക്കുന്ന പരിപാടിയിൽ സമസ്ത കേരള ജംഇയ്യതുൽ ഉലമ വൈസ് പ്രസിഡന്റ് അലി ബാഫഖി തങ്ങൾ പ്രാർഥനക്ക് നേതൃത്വം നൽകും.
സമ്മേളനത്തിൽ സമസ്ത കേരള ജംഇയ്യതുൽ ഉലമ സെക്രട്ടറിയും കുറ്റ്യാടി സിറാജുൽ ഹുദ ഇസ്ലാമിക് കോംപ്ലക്സ് അമരക്കാരനും പ്രമുഖ പണ്ഡിതനുമായ പേരോട് അബ്ദുറഹ്മാൻ സഖാഫി മുഖ്യപ്രഭാഷണം നടത്തും. ഐ.സി.എഫ് ബഹ്റൈൻ നാഷനൽ പ്രസിഡന്റ് സൈനുദ്ദീൻ സഖാഫി സമ്മേളനം ഉദ്ഘാടനം ചെയ്യും.
ബഹ്റൈനിലെ അറബി പ്രമുഖരും സാംസ്കാരിക നേതാക്കളും ഐ.സി.എഫ്, ആർ.എസ്.സി നേതാക്കളും പ്രവർത്തകരും പരിപാടിയിൽ പങ്കെടുക്കും. മീലാദ് കാമ്പയിനിന്റെ ഭാഗമായി മൗലിദ് ജൽസകൾ, പ്രകീർത്തന സംഗമങ്ങൾ, പുസ്തകവിതരണം തുടങ്ങി വ്യത്യസ്ത പരിപാടികൾ സംഘടിപ്പിക്കും.
10 വർഷത്തിനിടെ നിരവധി ജീവകാരുണ്യ, സാമൂഹിക പ്രവർത്തനങ്ങൾ നടത്താൻ സംഘടനക്കായതായി ഭാരവാഹികൾ പറഞ്ഞു. കരിയർ ഗൈഡൻസ്, സാംസ്കാരിക കൂട്ടായ്മകൾ, ആത്മീയ വേദികൾ തുടങ്ങിയ പ്രവർത്തനങ്ങളും കെ.സി.എഫിന്റെ കീഴിൽ നടന്നുവരുന്നു. കോവിഡ് സമയത്ത് ബഹ്റൈനിലും നാട്ടിലുമായി ഭക്ഷണക്കിറ്റും മറ്റു സഹായങ്ങളും ചെയ്തിരുന്നു.
നോർത്ത് കർണാടക കേന്ദ്രീകരിച്ച് അൽ ഇഹ്സാൻ എന്ന പദ്ധതിയിലൂടെ അവിടെയുള്ള സമൂഹത്തിന്റെ ഉന്നമനത്തിനുവേണ്ടിയും പ്രവർത്തിക്കുന്നു. വാർത്തസമ്മേളനത്തിൽ കെ.സി.എഫ് ഇന്റർനാഷനൽ കൗൺസിൽ ഫിനാൻഷ്യൽ കൺട്രോളർ അലി മുസ്ലിയാർ, പ്രഫഷനൽ ഡെവലപ്മെന്റ് ഡിവിഷൻ കോഓഡിനേറ്റർ ബഷീർ കാർളെ, കെ.സി.എസ് ബഹ്റൈൻ പ്രസിഡന്റ് ജമാൽ വിട്ടൽ, സെക്രട്ടറി ഹാരിസ് സാമ്പിയ, ട്രഷറർ സൂഫി ഹാജി, സ്വാഗതസംഘം ചെയർമാൻ നസീർ ദേർളക്കട്ടെ, കൺവീനർ ഇർഫാൻ മേൽക്കാർ, ഫിനാൻസ് കമ്മിറ്റി ചെയർമാൻ ഇബ്രാഹീം സഅദി, സ്വാഗതസംഘം വൈസ് ചെയർമാൻ ഹനീഫ് മുസ്ലിയാർ, മീഡിയ കമ്മിറ്റി ചെയർമാൻ ശിഹാബ് പരപ്പ എന്നിവർ പങ്കെടുത്തു.