മനാമ: സെപ്റ്റംബര്‍ 28 നും ഒക്ടോബര്‍ 4 നും ഇടയില്‍ രാജ്യത്തുടനീളം ലേബര്‍ മാര്‍ക്കറ്റ് റെഗുലേറ്ററി അതോറിറ്റി (എല്‍എംആര്‍എ) 1,835 പരിശോധനാ കാമ്പെയ്നുകള്‍ നടത്തി. തൊഴില്‍ നിയമം ലംഘിച്ച 21 പേരെ കസ്റ്റഡിയിലെടുത്തതായും 98 നിയമലംഘകരെ നാടുകടത്തിയതായും എല്‍എംആര്‍എ അറിയിച്ചു.
എല്ലാ ഗവര്‍ണറേറ്റുകളിലെയും വിവിധ കടകളില്‍ 1,805 പരിശോധനാ സന്ദര്‍ശനങ്ങളും 30 സംയുക്ത പരിശോധനാ കാമ്പെയ്നുകളുമാണ് നടത്തിയത്. ക്യാപിറ്റല്‍ ഗവര്‍ണറേറ്റില്‍ 16 കാമ്പെയ്നുകള്‍, മുഹറഖ് ഗവര്‍ണറേറ്റില്‍ 3 കാമ്പെയ്നുകള്‍, നോര്‍ത്തേണ്‍ ഗവര്‍ണറേറ്റില്‍ 4 കാമ്പെയ്നുകള്‍, സതേണ്‍ ഗവര്‍ണറേറ്റില്‍ 7 കാമ്പെയ്നുകള്‍ എന്നിങ്ങനെയാണ് നടത്തിയത്.
ദേശീയത, പാസ്പോര്‍ട്ട്സ് ആന്‍ഡ് റെസിഡന്‍സ് അഫയേഴ്സ് പ്രതിനിധീകരിക്കുന്ന ആഭ്യന്തര മന്ത്രാലയം, ഗവര്‍ണറേറ്റിലെ അതത് പോലീസ് ഡയറക്ടറേറ്റ്, ജനറല്‍ ഡയറക്ടറേറ്റ് ഓഫ് വെര്‍ഡിക്റ്റ് എന്‍ഫോഴ്സ്മെന്റ് ആന്‍ഡ് ആള്‍ട്ടര്‍നേറ്റീവ് സെന്റന്‍സിംഗ്, സോഷ്യല്‍ ഇന്‍ഷുറന്‍സ് ഓര്‍ഗനൈസേഷന്‍, ബഹ്റൈന്‍ ടൂറിസം ആന്‍ഡ് എക്‌സിബിഷന്‍സ് അതോറിറ്റി എന്നിവയാണ് കാമ്പെയ്നുകളില്‍ പങ്കെടുത്ത സര്‍ക്കാര്‍ സ്ഥാപനങ്ങള്‍.
