മനാമ: 2025 ഡിസംബറില്‍ നടക്കാനിരിക്കുന്ന കേരള തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് നിലവിലെ സംസ്ഥാന സര്‍ക്കാരിന്റെ ജനവിരുദ്ധ നയങ്ങള്‍ക്കും അനിയന്ത്രിതമായ ധൂര്‍ത്തിനും ഭരണപരമായ വീഴ്ചകള്‍ക്കുമെതിരെ ജനകീയ വിധി എഴുതാനുള്ള നിര്‍ണ്ണായക അവസരമാണെന്ന് ഐവൈസിസി ബഹ്റൈന്‍. നിലവില്‍ അന്വേഷണത്തിലിരിക്കുന്ന ശബരിമല സ്വര്‍ണ്ണക്കൊള്ളക്കേസുമായി ബന്ധപ്പെട്ട് സര്‍ക്കാരിനും സിപിഎം നേതൃത്വത്തിനും നേരെ ഉയര്‍ന്നുവന്ന ഗുരുതരമായ ആരോപണങ്ങള്‍ ഭരണകൂടത്തിന്റെ വിശ്വാസ്യതയെ ചോദ്യം ചെയ്യുന്നു. ഇത് വിശ്വാസ സമൂഹത്തോടുള്ള വഞ്ചനയായി വിലയിരുത്തേണ്ടതുണ്ട്.
കൂടാതെ, പ്രവാസി വിമാന യാത്രാക്കൂലി വര്‍ധന നിയന്ത്രിക്കുന്നതില്‍ പരാജയപ്പെട്ടതും നോര്‍ക്കയുടെ നിസ്സംഗതയും പ്രവാസികളോടുള്ള സര്‍ക്കാരിന്റെ വിമുഖത വ്യക്തമാക്കുന്നു. സംസ്ഥാനത്തെ കടുത്ത സാമ്പത്തിക പ്രതിസന്ധി പരിഹരിക്കുന്നതില്‍ പരാജയപ്പെട്ട സര്‍ക്കാര്‍, അമിതമായ ധൂര്‍ത്തും കെടുകാര്യസ്ഥതയും തുടരുന്നതിനോടൊപ്പം അമിത നികുതിഭാരം അടിച്ചേല്‍പ്പിച്ച് ജനങ്ങളെ ദുരിതത്തിലാക്കി.
പിന്‍വാതില്‍ നിയമനങ്ങള്‍ വ്യാപകമായതും തദ്ദേശ സ്ഥാപനങ്ങളുടെ വികസന ഫണ്ടുകള്‍ വെട്ടിക്കുറച്ചതും സംസ്ഥാനത്തെ വികസന മുരടിപ്പിലേക്ക് നയിച്ചു. അഴിമതി രഹിതവും സുതാര്യവുമായ ഭരണത്തിന് ഉറപ്പുനല്‍കുന്ന യുഡിഎഫ് സ്ഥാനാര്‍ത്ഥികളെ വിജയിപ്പിക്കേണ്ടതിന്റെ പ്രാധാന്യം സംഘടന ഊന്നിപ്പറഞ്ഞു.
തദ്ദേശ തിരഞ്ഞെടുപ്പിലെ യുഡിഎഫ് വിജയം 2026 ലെ നിയമസഭാ തിരഞ്ഞെടുപ്പില്‍ ജനക്ഷേമകരമായ യുഡിഎഫ് ഭരണം തിരികെ കൊണ്ടുവരാനുള്ള ശക്തമായ അടിത്തറയായി മാറുമെന്നും ഐവൈസിസി ബഹ്റൈന്‍ പ്രത്യാശ പ്രകടിപ്പിച്ചു. കേരളത്തിന്റെ നല്ല ഭാവിക്കായി, യുഡിഎഫ് സ്ഥാനാര്‍ത്ഥികള്‍ക്ക് വോട്ട് ചെയ്യാന്‍ പ്രവാസികള്‍ ഉള്‍പ്പെടെയുള്ളവര്‍ തങ്ങളുടെ കുടുംബാംഗങ്ങളോട് ആവശ്യപ്പെടണമെന്ന് ഐവൈസിസി ബഹ്റൈന്‍ ദേശീയ പ്രസിഡന്റ് ഷിബിന്‍ തോമസ്, ജനറല്‍ സെക്രട്ടറി രഞ്ജിത്ത് മാഹി, ട്രഷറര്‍ ബെന്‍സി ഗനിയുഡ് അഭ്യര്‍ത്ഥിച്ചു.
