മനാമ: ജീവകാരുണ്യം, യുവജനക്ഷേമം, തൊഴിൽപരമായ കൂട്ടായ്മകൾ, സാംസ്കാരിക പ്രവർത്തനങ്ങൾ, സാമൂഹിക സേവനങ്ങൾ എന്നിങ്ങനെ വിവിധ മേഖലകളിൽ പ്രവർത്തിച്ചിരുന്ന 62 സൊസൈറ്റികളും അസോസിയേഷനുകളും ക്ലബ്ബുകളും പിരിച്ചുവിട്ട് ലിക്വിഡേറ്റ് ചെയ്യാൻ ഉത്തരവ്. സാമൂഹിക വികസന മന്ത്രി ഒസാമ ബിൻ അൽ അലവി പുറപ്പെടുവിച്ച 2026-ലെ 16-ാം നമ്പർ തീരുമാനപ്രകാരമാണ് ഈ നടപടി. ഏറ്റവും പുതിയ ഔദ്യോഗിക ഗസറ്റിലാണ് ഈ ഉത്തരവ് പ്രസിദ്ധീകരിച്ചിരിക്കുന്നത്.
ചരിത്രപരമായ ഈ കൂട്ടപ്പിരിച്ചുവിടലിൽ ജീവകാരുണ്യ സംഘടനകൾ, പ്രൊഫഷണൽ മെഡിക്കൽ അസോസിയേഷനുകൾ, പ്രവാസി ക്ലബ്ബുകൾ, പരിസ്ഥിതി സംഘടനകൾ, വനിതാ കൂട്ടായ്മകൾ, യുവജന പ്രസ്ഥാനങ്ങൾ എന്നിവ ഉൾപ്പെടുന്നു. സതേൺ റീജിയൻ ചാരിറ്റബിൾ അസോസിയേഷൻ, അൽ ബറക ചാരിറ്റബിൾ സോഷ്യൽ അസോസിയേഷൻ, ബഹ്റൈൻ എൻവയോൺമെന്റ് അസോസിയേഷൻ, ബഹ്റൈൻ ചൈൽഡ് സേഫ്റ്റി അസോസിയേഷൻ, ബഹ്റൈൻ യൂത്ത് ഫോറം സൊസൈറ്റി തുടങ്ങിയവ ഈ പട്ടികയിലുള്ള പ്രധാന സംഘടനകളിൽ ചിലതാണ്.
കൂടാതെ വിവിധ പ്രവാസി-അന്താരാഷ്ട്ര കൂട്ടായ്മകളെയും തീരുമാനം ബാധിച്ചിട്ടുണ്ട്. ഈജിപ്ഷ്യൻ ക്ലബ് ഇൻ ബഹ്റൈൻ, കൊറിയൻ ക്ലബ്, കുവൈറ്റ് സ്റ്റുഡന്റ്സ് ക്ലബ്, ഓസ്ട്രേലിയൻസ് അസോസിയേഷൻ, ബഹ്റൈൻ-ബംഗ്ലാദേശ് ഫ്രണ്ട്ഷിപ്പ് സൊസൈറ്റി, ബഹ്റൈൻ-ഫ്രഞ്ച് ബിസിനസ് ക്ലബ് എന്നിവയും പിരിച്ചുവിടപ്പെട്ടവയിൽ ഉൾപ്പെടുന്നു.
ഈ 62 സംഘടനകളുടെയും ലിക്വിഡേഷൻ നടപടികൾ കൈകാര്യം ചെയ്യുന്നതിനായി ‘തലാൽ അബു-ഗസാല ആൻഡ് പാർട്ണേഴ്സ് ഇന്റർനാഷണൽ’ എന്ന സ്ഥാപനത്തെ ലിക്വിഡേറ്ററായി നിയമിച്ചിട്ടുണ്ട്. ഉത്തരവ് പുറത്തിറങ്ങിയ തീയതി മുതൽ 18 മാസത്തേക്കാണ് ലിക്വിഡേഷൻ നടപടികൾ നിശ്ചയിച്ചിരിക്കുന്നത്.
