മനാമ: കോവിഡ് പ്രതിരോധത്തിൻറെ ഭാഗമായി ദേശീയ മെഡിക്കൽ ടാസ്‌ക്‌ഫോഴ്‌സിൻറെ നിർദേശാനുസരണം റെഡ് ലിസ്റ്റ് രാജ്യങ്ങളുടെ എണ്ണം വിപുലീകരിച്ച് സിവിൽ ഏവിയേഷൻ അഫയേഴ്സ്. നിലവിലുള്ള 6 രാജ്യങ്ങൾക്ക് പുറമെ 16 രാജ്യങ്ങളെയാണ് പുതുതായി ലിസ്റ്റിൽ ഉൾപ്പെടുത്തിയത്.
മൊസാംബിക്ക്, മ്യാൻമർ, സിംബാബ്‌വെ, മംഗോളിയ, നമീബിയ, മെക്സിക്കോ, ടുണീഷ്യ, ഇറാൻ, ദക്ഷിണാഫ്രിക്ക, ഇന്തോനേഷ്യ, ഇറാഖ്, ഫിലിപ്പീൻസ്, പനാമ, മലേഷ്യ, ഉഗാണ്ട, ഡൊമിനിക്കൻ റിപ്പബ്ലിക് എന്നിവയാണ് പുതുതായി ഉൾപ്പെട്ട രാജ്യങ്ങൾ. ഇന്ത്യ, പാകിസ്താൻ, ശ്രീലങ്ക, ബംഗ്ലാദേശ്, നേപ്പാൾ, വിയറ്റ്നാം എന്നീ രാജ്യങ്ങളാണ് നേരത്തെ റെഡ് ലിസ്റ്റിൽ ഉൾപ്പെട്ടിരുന്നത്.
ബഹ്റൈൻ പൗരൻമാർക്കും ബഹ്റൈനിൽ റസിഡൻസ് വിസയുള്ളവർക്കും മാത്രമാകും ഈ രാജ്യങ്ങളിൽനിന്നും പ്രവേശനം അനുവദിക്കുക. റെഡ് ലിസ്റ്റിൽ ഉൾപ്പെട്ട രാജ്യങ്ങളിൽ നിന്നും വരുന്നവർ പത്ത് ദിവസത്തെ ക്വാറൻന്റീനിൽ കഴിയണമെന്നതടക്കമുള്ള വ്യവസ്ഥകൾ തുടരും. സ്വന്തം പേരിലോ അടുത്ത കുടുംബാംഗത്തിന്റെ പേരിലോ ഉള്ള താമസ രേഖ അല്ലെങ്കിൽ എൻ ഏച്ച് ആർ എ അംഗീകരിച്ച ഹോട്ടലുകളിൽ സ്വന്തം പേരിൽ നടത്തിയ പ്രീപെയ്ഡ് സർവീസിന്റെ രേഖ യാത്രക്കാർ ഹാജരാക്കണം. ലീസ്/ റെൻറ് എഗ്രിമെൻറ്, ഇലക്ട്രിസിറ്റി ബിൽ എന്നിവ താമസ രേഖയായി ഹാജരാക്കാം. ഇതില്ലാത്തവർക്ക് അംഗീകൃത ഹോട്ടൽ ബുക്കിംഗ് രേഖ കാണിച്ചാൽ മാത്രമേ ബഹ്റൈനിലേക്ക് പ്രവേശനം സാധ്യമാകൂ.
