മൂന്ന് കോവിഡ് പരിശോധനകൾക്കായി എയർപോർട്ടിൽ അടക്കേണ്ട തുക 36 ദിനാറാക്കി

മനാമ: ബഹ്‌റൈനിലെത്തുന്ന യാത്രക്കാർക്കുള്ള പുതുക്കിയ മാനദണ്ഡങ്ങൾ കഴിഞ്ഞ ദിവസം മുതൽ പ്രാബല്യത്തിലായി. ഇത് പ്രകാരം ആഗസ്​റ്റ്​ 29 മുതൽ ബഹ്​റൈനിലേക്ക്​ വരുന്ന ആറു വയസും അതിൽ കൂടുതലും ഉള്ളവർ ഇനി മുതൽ അഞ്ചാം ദിവസവും കോവിഡ്​ പി.സി.ആർ പരിശോധന നടത്തണം. ഇതുവരെ വിമാനത്താവളത്തിൽ എത്തുമ്പോഴും തുടർന്ന്​ 10ാം ദിവസവുമായിരുന്നു​ പരിശോധന നടത്തേണ്ടിയിരുന്നത്​. കോവിഡ്​ പ്രതിരോധ മെഡിക്കൽ സമിതിയുടെ നിർദേശപ്രകാരമാണ് സിവിൽ ഏവിയേഷൻ അഫയേഴ്​സ് തീരുമാനം പ്രഖ്യാപിച്ചിരുന്നത്​. ഇതോടെ മൂന്നു പരിശോധനകൾക്കുമായി എയർപോർട്ടിൽ വന്നിറങ്ങുമ്പോൾ അടക്കേണ്ട തുക 36 ദിനാറാക്കി. നേരത്തെ രണ്ട് റെസ്റ്റുകൾക്കായി 24 ദിനാറായിരുന്നു അടക്കേണ്ടിയിരുന്നത്. പരിശോധനകൾക്കുള്ള പേയ്മെന്റ് എയർപോർട്ടിലെ കിയോസ്ക് വഴിയോ അല്ലെങ്കിൽ ‘ബിഅവെയർ ബഹ്‌റൈൻ’ ആപ്ലിക്കേഷൻ വഴി അടക്കാവുന്നതാണ്.