മനാമ: പഠനത്തിൽ മികവുപുലർത്തിയ വിദ്യാർഥികളെ പാലക്കാട് ആർട്സ് ആൻഡ് കൾച്ചറൽ തിയറ്റർ (പാക്ട്) ആദരിച്ചു. ബാങ് സാങ് തായ് ഹോട്ടലിൽ നടന്ന ചടങ്ങിൽ വ്യവസായ പ്രമുഖൻ പമ്പാവാസൻ നായർ മുഖ്യാതിഥിയായി. ഇന്ത്യൻ സ്കൂൾ വൈസ് പ്രിൻസിപ്പൽ ആനന്ദ് ആർ. നായർ വിശിഷ്ടാതിഥിയായിരുന്നു.
10, 12 ക്ലാസുകളിൽ മികച്ച വിജയംനേടിയ 20 കുട്ടികളെയാണ് ആദരിച്ചത്. കുട്ടികൾ സമൂഹത്തോട് കടപ്പാടുള്ള നല്ല പൗരന്മാരായി വളരാനാണു ശ്രമിക്കേണ്ടതെന്ന് പമ്പാവാസൻ നായർ ഓർമപ്പെടുത്തി. കുട്ടികൾ തങ്ങൾക്ക് ഇഷ്ടമുള്ള മേഖല സ്വയം തെരഞ്ഞെടുത്ത് അതിൽ വൈഭവമുള്ളവരായി തീരണമെന്ന് ആനന്ദ് നായർ പറഞ്ഞു.
ബഹ്റൈനിലെ വിവിധ സംഘടനകൾ നടത്തിയ മത്സരങ്ങളിൽ പ്രാവീണ്യം തെളിയിച്ച ശ്രീദക്ഷ സുനിലിനെയും നേഹ ജഗദീഷിനെയും ജി.ജി ഓട്ടോ, ഫ്യൂച്ചർ ആലിയ ബിൽഡേഴ്സ് ആൻഡ് പ്രോപർട്ടീസ് ചെയർമാൻ രവികുമാർ സമ്മാനങ്ങൾ നൽകി ആദരിച്ചു. തുടർന്ന് നടന്ന മെംബേഴ്സ് നെറ്റിൽ പാക്ട് അംഗങ്ങൾ വിവിധ കലാപരിപാടികൾ അവതരിപ്പിച്ചു.