മനാമ: വിവിധ രാജ്യങ്ങളിലെ മാമ്പഴങ്ങൾ പരിചയപ്പെടുത്തി ലുലു ഹൈപ്പർ മാർക്കറ്റിൽ ആരംഭിച്ച മാമ്പഴമേളയ്ക്ക് തുടക്കം കുറിച്ചു. മാമ്പഴങ്ങൾക്കൊപ്പം മാങ്ങകൊണ്ടുള്ള ഒട്ടേറെ വിഭവങ്ങളും അണിനിരത്തുന്ന മേള ഭക്ഷണപ്രേമികളെയും ആകർഷിക്കുകയാണ്.
ബഹ്റൈനിലെ ഡാന മാളിലെ ലുലു ഹൈപ്പർമാർക്കറ്റിൽ, മുഖ്യാതിഥി NIAD സെക്രട്ടറി ജനറൽ ശൈഖ മാരം ബിൻത് ഈസ അൽ ഖലീഫയും, ബഹുമാനപ്പെട്ട അതിഥി ഇന്ത്യൻ എംബസി സെക്കൻഡ് സെക്രട്ടറി രവി ജെയിനും ചേർന്ന് മാമ്പഴ മേള ഉദ്ഘാടനം ചെയ്തു. ലുലു ഗ്രൂപ്പ് ഡയറക്ടർ ജുസർ രൂപവാലയും ലുലു ഹൈപ്പർമാർക്കറ്റിന്റെ സീനിയർ മാനേജറും ചേർന്ന് ഇരുവരെയും മേളയിലേക്ക് സ്വാഗതം ചെയ്തു.
18 രാജ്യങ്ങളിൽ നിന്നുള്ള 88 തരം മാങ്ങകൾ കാണാനുള്ള അവസരമാണ് മേള ഒരുക്കുന്നത്. ഇന്ത്യ, യുഗാണ്ട, ശ്രീലങ്ക, കെനിയ, മലേഷ്യ, ഇന്തോനേഷ്യ, മൊറോക്കോ, യു.എസ്.എ, വിയറ്റ്നാം, ഫിലിപ്പീൻസ്, തായ്ലൻഡ്, യമൻ, യു.എ.ഇ, ഒമാൻ, സൗദി, കൊളംബിയ, ഈജിപ്ത്, പാകിസ്താൻ എന്നിവിടങ്ങളിൽ നിന്നുള്ള മാമ്പഴങ്ങളാണ് മേളയിലുള്ളത്. ‘കിങ്ഡം ഓഫ് മാംഗോസ്’ എന്ന പേരിൽ ജൂൺ നാലുവരെ നീണ്ടുനിൽക്കുന്ന മാമ്പഴമേളക്കായി 50 ടൺ മാങ്ങയാണ് എത്തിച്ചിട്ടുള്ളത്.
മാങ്ങ ഉപയോഗിച്ചുള്ള പാൻകേക്ക്, മാങ്ങ ചിക്കൻകറി, മാങ്ങ പുളിശ്ശേരി, മാങ്ങ മീൻകറി, മാങ്ങയിട്ട ചെമ്മീൻകറി, മാങ്ങ പായസം, മാങ്ങ ജിലേബി, ഹൽവ, മാങ്ങ സലാഡ്, മാങ്ങയിട്ട മീൻ കറി, മാങ്ങയിട്ട ചിക്കൻ കറി തുടങ്ങി നാവിൽ വെള്ളമൂറുന്ന ഒട്ടേറെ വിഭവങ്ങളാണ് മേളയിലുള്ളത്. ഇന്ത്യയിലെ പ്രശസ്തമായ അൽഫോൻസോ മാങ്ങ, മൽഗോവ എന്നിവയും മേളയിൽ എത്തിച്ചിട്ടുണ്ട്. മാമ്പഴമേളയിലൂടെ ലോകത്തിലെ ഏറ്റവും മികച്ച രുചികൾ എത്തിക്കാനാണ് ലക്ഷ്യമിടുന്നതെന്ന് ലുലു ഗ്രൂപ് ഡയറക്ടർ ജുസെർ രൂപവാല പറഞ്ഞു.
