മനാമ: ബഹ്റൈനില് പ്രവാസികള്ക്ക് ഡ്രൈവിംഗ് ലൈസന്സ് അനുവദിക്കുന്നതിന് പുതിയ നിയന്ത്രണങ്ങള് ഏര്പ്പെടുത്താനുള്ള രണ്ട് ബില്ലുകള് പാര്ലമെന്റ് ചര്ച്ചക്കെടുക്കുന്നു. എന്നാല്, ഈ നീക്കം ഭരണഘടനാപരമായ അവകാശങ്ങളുടെ ലംഘനമാകുമെന്ന് മുന്നറിയിപ്പ് നല്കിക്കൊണ്ട് സര്ക്കാര് ഇതിനെ എതിര്ത്തു.
നിലവിലുള്ള നിയമങ്ങള്ക്ക് പുറമെ വിദേശികള്ക്ക് ഡ്രൈവിംഗ് ലൈസന്സ് നല്കുന്നതിന് പുതിയ നിബന്ധനകള് ഏര്പ്പെടുത്താന് എക്സിക്യൂട്ടീവ് റെഗുലേഷനുകളെ അനുവദിക്കുന്ന ഒരു പുതിയ ആര്ട്ടിക്കിള് ട്രാഫിക് നിയമത്തില് ഉള്പ്പെടുത്തണം എന്ന് ഒരു ഭേദഗതി ആവശ്യപ്പെടുന്നു. അപേക്ഷകന്റെ ആവശ്യകത ബോധ്യപ്പെട്ടാല് മാത്രം ലൈസന്സ് നല്കുക എന്നതും ഇതില് ഉള്പ്പെടുന്നു.
ഡ്രൈവിംഗ് ലൈസന്സിന്റെ കാലാവധി പ്രവാസിയുടെ താമസരേഖയുടെ കാലാവധിയുമായി ബന്ധിപ്പിക്കുന്നതാണ് രണ്ടാമത്തെ ബില്ല്. പാര്ലമെന്റിലെ വിദേശകാര്യ, പ്രതിരോധ, ദേശീയ സുരക്ഷാ സമിതി ഈ നിര്ദ്ദേശങ്ങളെ പിന്തുണച്ചിട്ടുണ്ട്.
രാജ്യത്ത് വര്ദ്ധിച്ചുവരുന്ന ഗതാഗതക്കുരുക്ക് പരിഹരിക്കാനാണ് ഈ നീക്കമെന്ന് സമിതി അധ്യക്ഷന് ഹസ്സന് ബുഖമ്മാസ് പറഞ്ഞു. സ്വദേശികളേക്കാള് കൂടുതല് വിദേശികള് ഉള്ള സാഹചര്യത്തില്, റോഡുകളുടെ ശേഷിയേക്കാള് കൂടുതല് വാഹനങ്ങള് നിരത്തിലിറങ്ങുന്നത് നിയന്ത്രിക്കേണ്ടതുണ്ടെന്നും അദ്ദേഹം വാദിച്ചു.
അതേസമയം, ഈ നിര്ദ്ദേശങ്ങള്ക്കെതിരെ സര്ക്കാര് ശക്തമായ വിയോജിപ്പ് ഉന്നയിച്ചിട്ടുണ്ട്. ഭേദഗതികള് അനാവശ്യമാണെന്ന് സര്ക്കാര് വിശദമായ ഒരു മെമ്മോറാണ്ടത്തില് വാദിച്ചു. സഞ്ചാര സ്വാതന്ത്ര്യം എന്നത് ഭരണഘടന ഉറപ്പുനല്കുന്ന മൗലികാവകാശമാണെന്നും പുതിയ നിയന്ത്രണങ്ങള് ഇതിനെ ബാധിക്കുമെന്നും സര്ക്കാര് ചൂണ്ടിക്കാട്ടി.
വിദേശികള്ക്ക് ഡ്രൈവിംഗ് ലൈസന്സ് നിഷേധിക്കുന്നത് ബഹ്റൈന് ഭാഗമായ അന്താരാഷ്ട്ര മനുഷ്യാവകാശ കരാറുകള്ക്ക് വിരുദ്ധമായേക്കാം. ഓരോ പ്രവാസിയുടെയും താമസരേഖാ കാലാവധി വ്യത്യസ്തമായതിനാല് ലൈസന്സ് കാലാവധി അതുമായി ബന്ധിപ്പിക്കുന്നത് പ്രായോഗികമായി പ്രയാസകരമാണെന്ന് ആഭ്യന്തര മന്ത്രാലയം വ്യക്തമാക്കി. കൂടാതെ, ഇത്തരമൊരു നിയന്ത്രണം ഗതാഗതക്കുരുക്ക് കുറയ്ക്കാന് സഹായിക്കില്ലെന്നും മന്ത്രാലയം കൂട്ടിച്ചേര്ത്തു.
അടുത്ത ചൊവ്വാഴ്ച പാര്ലമെന്റില് നടക്കാനിരിക്കുന്ന ചര്ച്ച ഏറെ നിര്ണ്ണായകമാണ്. ഗതാഗത പ്രശ്നങ്ങളും ഭരണഘടനാപരമായ അവകാശങ്ങളും തമ്മിലുള്ള സങ്കീര്ണ്ണമായ പോരാട്ടമായിരിക്കും ഈ ബില്ലിന്മേല് നടക്കുക.
