മനാമ: ഇന്ത്യയുടെ 80-ാമത് സ്വാതന്ത്ര്യദിനം ബഹ്റൈനിലെ ഇന്ത്യൻ എംബസിയിൽ പ്രൗഢഗംഭീരമായി കൊണ്ടാടി. സീഫിലെ എംബസി അങ്കണത്തിൽ നടന്ന ചടങ്ങിൽ ഇന്ത്യൻ അംബാസഡർ എച്ച്.ഇ. മിസ്റ്റർ വിനോദ് കെ. ജേക്കബ് ദേശീയപതാക ഉയർത്തി. ആയിരത്തിലധികം പ്രവാസികളാണ് ചരിത്രപ്രധാനമായ ചടങ്ങിൽ പങ്കാളികളാകാൻ എത്തിയത്. രാഷ്ട്രപിതാവ് മഹാത്മാഗാന്ധിയുടെ ചിത്രത്തിന് മുന്നിൽ അംബാസഡർ പുഷ്പാർച്ചന നടത്തിയതോടെയാണ് ചടങ്ങുകൾക്ക് തുടക്കമായത്.
പതാകയുയർത്തലിന് ശേഷം ഇന്ത്യൻ രാഷ്ട്രപതിയുടെ സ്വാതന്ത്ര്യദിന സന്ദേശത്തിലെ പ്രധാന ഭാഗങ്ങൾ അംബാസഡർ സമൂഹത്തിന് വായിച്ചു കേൾപ്പിച്ചു. ‘വന്ദേമാതര’ത്തിന്റെ 150-ാം വാർഷികത്തിന്റെ ഭാഗമായി ബഹ്റൈൻ കേരളീയ സമാജം (BKS) അവതരിപ്പിച്ച ദേശീയഗാന ആലാപനം ചടങ്ങിന് പ്രത്യേക ദേശസ്നേഹത്തിന്റെ അനുഭൂതി പകർന്നു.
‘ഹർ ഘർ തിരംഗ’ കാമ്പെയ്ന്റെ ഭാഗമായി എംബസിയിൽ ഒരുക്കിയ പ്രത്യേക ഫോട്ടോ ബൂത്തിൽ പ്രവാസികൾ ആവേശത്തോടെ ചിത്രങ്ങൾ പകർത്തി. കൂടാതെ, വിദേശകാര്യ മന്ത്രാലയത്തിന്റെ ആഭിമുഖ്യത്തിൽ നടത്തിയ ‘ഭാരത് കോ ജാനിതേ’ ഓൺലൈൻ ക്വിസ് മത്സരത്തിൽ ബഹ്റൈനിൽ നിന്ന് മികച്ച വിജയം നേടിയ ആദ്യ അഞ്ച് സ്ഥാനക്കാരെയും ചടങ്ങിൽ ആദരിച്ചു.
ഇന്ത്യൻ കൗൺസിൽ ഫോർ കൾച്ചറൽ റിലേഷൻസുമായി (ICCR) ചേർന്ന് എംബസി സംഘടിപ്പിച്ച മധുബാനി വെർച്വൽ ആർട്ട് വർക്ക്ഷോപ്പിൽ പങ്കെടുത്തവർക്കുള്ള സർട്ടിഫിക്കറ്റുകളും വിതരണം ചെയ്തു. വർക്ക്ഷോപ്പിൽ തയാറാക്കിയ മനോഹരമായ ചിത്രങ്ങളുടെ പ്രദർശനവും ചടങ്ങിന്റെ ഭാഗമായി ഒരുക്കിയിരുന്നു.
