മനാമ: ബഹ്‌റൈനിലെ ഇന്ത്യൻ കമ്മ്യൂണിറ്റി വെൽഫെയർ അസോസിയേഷന്റെ നേതൃത്വത്തിൽ സംഘടിപ്പിച്ച 18-ാമത് വാർഷിക ചിത്രരചനാ മത്സരമായ ‘ഫേബർ-കാസ്റ്റൽ സ്പെക്ട്ര 2026’ ഇസാ ടൗണിലെ ഇന്ത്യൻ സ്കൂൾ കാമ്പസിൽ വെച്ച് പ്രൗഢഗംഭീരമായി സമാപിച്ചു. ബഹ്‌റൈനിലെ ഏറ്റവും വലിയ വിദ്യാർത്ഥി ചിത്രരചനാ മത്സരമായി അറിയപ്പെടുന്ന സ്പെക്ട്രയിൽ ഇത്തവണ 28-ഓളം സ്കൂളുകളിൽ നിന്നായി 2,500-ലധികം മത്സരാർത്ഥികൾ പങ്കെടുത്തു.
രാവിലെ നടന്ന ഉദ്ഘാടന ചടങ്ങിൽ ഐ.സി.ആർ.എഫ് ചെയർമാൻ അഡ്വ. വി.കെ. തോമസ് ഭദ്രദീപം തെളിയിച്ചു. ജനറൽ സെക്രട്ടറി അനീഷ് ശ്രീധരൻ, സ്പെക്ട്ര കൺവീനർ നിതിൻ ജേക്കബ്, ഉപദേശകരായ അരുൾദാസ് തോമസ്, ഡോ. ബാബു രാമചന്ദ്രൻ, വൈസ് ചെയർമാൻ പങ്കജ് നല്ലൂർ, ജോയിന്റ് സെക്രട്ടറിമാരായ സുരേഷ് ബാബു, ജവാദ് പാഷ, സ്പെക്ട്ര ജോയിന്റ് കൺവീനർമാരായ ശ്രീധർ, സുനിൽ കുമാർ എന്നിവർ സന്നിഹിതരായിരുന്നു. വിദ്യാർത്ഥികൾക്കായി നാല് പ്രായവിഭാഗങ്ങളിലും (5-8, 8-11, 11-13, 14-18 വയസ്സ്), 18 വയസ്സിന് മുകളിലുള്ള മുതിർന്നവർക്കായി പ്രത്യേക വിഭാഗത്തിലുമാണ് മത്സരങ്ങൾ നടന്നത്.
വിജയികളെ അന്നേദിവസം പ്രഖ്യാപിച്ച് ചരിത്രനേട്ടം
ഈ വർഷത്തെ മത്സരത്തിന്റെ ഏറ്റവും വലിയ സവിശേഷത ഫലപ്രഖ്യാപനം അന്നേദിവസം വൈകുന്നേരം തന്നെ നടത്തി എന്നതാണ്. ഇന്ത്യൻ സ്കൂൾ ജഷൻമാൽ ഓഡിറ്റോറിയത്തിൽ നടന്ന സമാപന സമ്മേളനത്തിൽ ബഹ്‌റൈനിലെ ഇന്ത്യൻ അംബാസഡർ ഡോ. പ്രദീപ് കുമാർ രാജ്പുരോഹിത് മുഖ്യാതിഥിയായി പങ്കെടുക്കുകയും വിജയികൾക്ക് ട്രോഫികളും സർട്ടിഫിക്കറ്റുകളും വിതരണം ചെയ്യുകയും ചെയ്തു. ഓരോ വിഭാഗത്തിലെയും ആദ്യ അഞ്ച് സ്ഥാനക്കാർക്ക് ട്രോഫികളും, മികച്ച 50 പേർക്ക് മെഡലുകളും നൽകി. തിരഞ്ഞെടുക്കപ്പെടുന്ന മികച്ച ചിത്രങ്ങൾ 2027-ലെ ഐ.സി.ആർ.എഫ് വാൾ-ഡെസ്ക്ടോപ്പ് കലണ്ടറുകളിൽ ഉൾപ്പെടുത്തും.
വിവിധ വിഭാഗങ്ങളിലെ വിജയികൾ:
-
ഗ്രൂപ്പ് 1 (5-8 വയസ്സ്): 1. ഉന്നതി ഗുപ്ത (ന്യൂ മില്ലേനിയം സ്കൂൾ), 2. അൻസിക മൊണ്ടാൽ (ഏഷ്യൻ സ്കൂൾ), 3. മൈറ അനാം (ഏഷ്യൻ സ്കൂൾ), 4. യുസ്ര ഖാസിം (ഇന്ത്യൻ സ്കൂൾ), 5. ആരാധ്യ മനോജ് (ഏഷ്യൻ സ്കൂൾ).
-
ഗ്രൂപ്പ് 2 (8-11 വയസ്സ്): 1. കൊറാസൺ ജനീൽ വിനാസ് (ഫിലിപ്പൈൻ സ്കൂൾ ബഹ്‌റൈൻ), 2. അദ്വിക ഹൗളാദർ (ബഹ്‌റൈൻ ഇന്ത്യൻ സ്കൂൾ), 3. ഐസ അസ്ഹർ മട്ടത്തൊടി (ഇന്ത്യൻ സ്കൂൾ), 4. ധ്രുവ് ടിനി ചന്ദ് (ഇന്ത്യൻ സ്കൂൾ), 5. ജന്യ ബത്ര (ന്യൂ മില്ലേനിയം സ്കൂൾ).
-
ഗ്രൂപ്പ് 3 (11-13 വയസ്സ്): 1. അദിതി ത്യാഗരാജൻ (ന്യൂ മില്ലേനിയം സ്കൂൾ), 2. ഫാത്തിമ നഷ്‌വ (ഇബ്ൻ അൽ ഹൈതം സ്കൂൾ), 3. അസ്ഫിറീൻ എറം അൻസാരി (ഇബ്ൻ അൽ ഹൈതം സ്കൂൾ), 4. ഒയിൻഡ്രില ഡേ (ന്യൂ ഇന്ത്യൻ സ്കൂൾ), 5. ആൻഡ്രിയ ഷെർവിൻ വിനീഷ് (ന്യൂ ഇന്ത്യൻ സ്കൂൾ).
-
ഗ്രൂപ്പ് 4 (14-18 വയസ്സ്): 1. വൈഗ വിനോദ് (ഇന്ത്യൻ സ്കൂൾ), 2. മറിയം കമാൽ (ന്യൂ ഇന്ത്യൻ സ്കൂൾ), 3. ഗോപിക ഭാരതിരാജൻ (ഏഷ്യൻ സ്കൂൾ), 4. സാന്ദ്ര ശ്യാം (ന്യൂ ഹൊറൈസൺ സ്കൂൾ), 5. പ്രാൻഷു സൈനി (ഇന്ത്യൻ സ്കൂൾ).
-
ഗ്രൂപ്പ് 5 (മുതിർന്നവരുടെ വിഭാഗം): 1. നിതാഷ ബിജു, 2. ശ്രുതി രഞ്ജിത്ത്, 3. ഫാത്തിമ സഹ്‌ല.
ചടങ്ങിൽ ഫേബർ-കാസ്റ്റൽ ബഹ്‌റൈൻ കൺട്രി ഹെഡ് അബ്ദുൾ ഷുക്കൂർ മുഹമ്മദ്, മലബാർ ഗോൾഡ് പ്രതിനിധി ഹംദാൻ, ഇന്ത്യൻ സ്കൂൾ ചെയർമാൻ ബിനു മണ്ണിൽ വർഗീസ്, പ്രിൻസിപ്പൽ ശാന്തകുമാർ ദാസരി, വിവിധ സ്കൂൾ പ്രിൻസിപ്പൽമാർ, സാമൂഹിക-സാംസ്‌കാരിക രംഗത്തെ പ്രമുഖർ എന്നിവർ പങ്കെടുത്തു.
