മനാമ: ഇന്ത്യൻ സ്‌കൂൾ മെഗാ ഫെയറിന്റെ ഭാഗമായ തരംഗ് ഫിനാലെ ബുധനാഴ്ച അരങ്ങേറും. ഒരാഴ്ചയായി നടന്നുവന്ന ഇന്ത്യൻ സ്‌കൂൾ യുവജനോത്സവമായ തരംഗിന്റെ പര്യവസാനമാണ് ബുധനാഴ്ച ഈസ ടൗണിലെ സ്‌കൂൾ ഗ്രൗണ്ടിൽ നടക്കുന്നത്.
വൈകീട്ട് അഞ്ച് മുതൽ 11 വരെ നടക്കുന്ന പരിപാടിയിൽ യുവജനോത്സവത്തിലെ മികച്ച നൃത്ത ഇനങ്ങൾ അവതരിപ്പിക്കും. തരംഗ് യുവജനോത്സവത്തിൽ ഓവറോൾ ചാമ്പ്യൻഷിപ് നേടിയ ഹൗസിനും കലാപ്രതിഭകൾക്കുമുള്ള സമ്മാനദാനവും നടക്കും. നവംബർ 24നും 25നും നടക്കുന്ന സംഗീത പരിപാടിയിൽ പ്രവേശനം ടിക്കറ്റ് മുഖേന ആയിരിക്കും. 24ന് സിദ്ധാർഥ് മേനോനും മൃദുല വാര്യരും സംഘവും അവതരിപ്പിക്കുന്ന സംഗീത പരിപാടിയാണ് മുഖ്യ ആകർഷണം. സച്ചിൻ വാര്യർ, ആവണി, വിഷ്ണു ശിവ, അബ്ദുൽ സമദ് എന്നീ ഗായകരും സംഘത്തിലുണ്ട്. 25ന് ബോളിവുഡ്‌ ഗായിക ഭൂമി ത്രിവേദിയും സംഘവും നയിക്കുന്ന സംഗീത നിശ അരങ്ങേറും.
പരിപാടിയിൽ പങ്കെടുക്കുന്നവർക്കായി നാഷനൽ സ്റ്റേഡിയത്തിനു സമീപം പാർക്കിങ് സൗകര്യം ഏർപ്പെടുത്തിയിട്ടുണ്ട്. സ്റ്റേഡിയത്തിൽനിന്ന് സ്‌കൂളിലേക്ക് ഷട്ടിൽ ബസ് സൗകര്യവുമുണ്ട്. ഫെയർ ടിക്കറ്റുകൾ സ്‌കൂളിലും ലഭ്യമായിരിക്കും.
സയാനി മോട്ടോഴ്‌സ് അവതരിപ്പിക്കുന്ന ഇന്ത്യൻ സ്‌കൂൾ മെഗാ മേളയുടെയും ഫുഡ് ഫെസ്റ്റിവലിന്റെയും ഇവന്റ്സ് പാർട്ണർ സ്റ്റാർ വിഷനാണ്. സ്‌കൂളിലും പരിസരങ്ങളിലും സി.സി ടി.വി നിരീക്ഷണം ഉൾപ്പെടെ സുരക്ഷാ ക്രമീകരണങ്ങൾ ഏർപ്പെടുത്തിയതായി ഇന്ത്യൻ സ്‌കൂൾ അധികൃതർ അറിയിച്ചു.
