മനാമ: ഫ്രൻഡ്സ് അസോസിയേഷൻ ഓഫ് തിരുവല്ല (ഫാറ്റ്) സിൽവർ ജൂബിലി ആഘോഷം മന്ത്രി റോഷി അഗസ്റ്റിൻ ഉദ്ഘാടനം ചെയ്തു. പ്രവാസ സമൂഹത്തിന്റെ നന്മ ലക്ഷ്യംവെച്ചുകൊണ്ട് വിവിധ മേഖലകളിൽ പ്രവർത്തിക്കുന്ന തിരുവല്ല മണ്ണിൽ ബോബൻ തോമസിനെ ബിസിനസ് എക്സലൻസി അവാർഡ് നൽകി ചടങ്ങിൽ ആദരിച്ചു. ‘ഫാറ്റി’ന്റെ ആദ്യകാല ഭാരവാഹികളെയും വിവിധ പ്രതിഭകളെയും ഇതോടൊപ്പം ആദരിച്ചു.
തിരുവല്ലയിലെ ഹോസ്പിറ്റലുകളുമായി സഹകരിച്ച് 25 കിഡ്നി രോഗികൾക്ക് ഒരു വർഷം സൗജന്യമായി ഡയാലിസിസ് ചെയ്യുന്നതിനുള്ള ‘ഫാറ്റ് സ്നേഹസ്പർശം’ പദ്ധതിയുടെ ഉദ്ഘാടനം പ്രോഗ്രാം കമ്മിറ്റി രക്ഷാധികാരി കെ.ജി. ബാബുരാജൻ നിർവഹിച്ചു. ഫാറ്റ് പ്രസിഡന്റ് റോബി ജോർജ് അധ്യക്ഷത വഹിച്ച യോഗത്തിൽ കുവൈത്ത് പ്രവാസി അസോസിയേഷൻ ഓഫ് തിരുവല്ല സെക്രട്ടറി ജെയിംസ് കൊട്ടാരത്തിൽ, വർഗീസ് ഡാനിയേൽ, ദേവരാജൻ എന്നിവർ സംസാരിച്ചു. ഫാറ്റ് ജനറൽ സെക്രട്ടറി അനിൽകുമാർ സ്വാഗതവും ജനറൽ കൺവീനർ നെൽജിൻ നെപ്പോളിയൻ നന്ദിയും പറഞ്ഞു. തുടർന്ന് മാസ്റ്റർ റിതുരാജ്, പ്രസീത മനോജ്, കെ.ജി. രാജീവ് കുമാർ, സിയോൻ ഷാജി എന്നിവർ നേതൃത്വം നൽകിയ ഗാനമേളയും അരങ്ങേറി. പരിപാടികൾക്ക് പ്രോഗ്രാം കമ്മിറ്റി കൺവീനർ ജെയിംസ്, മനോജ് ശങ്കർ, ശ്രീകുമാർ, മനോജ് മാത്യു, ബ്ലെസൻ, വിനു ഐസക്, നിധിൻ, ജോബിൻ, ടോബി, വിനോദ് കുമാർ, എബ്രഹാം ജോൺ, ജോർജ് ബെഞ്ചമിൻ, സജി ചെറിയാൻ, നൈനാൻ, ഷിബു കൃഷ്ണ, ഷിജിൻ ഷാജി എന്നിവർ പരിപാടിക്ക് നേതൃത്വം നൽകി.