മനാമ: ബഹ്റൈൻ കേരള സോഷ്യൽ ഫോറം നേതൃത്വത്തിൽ സംഘടിപ്പിച്ച ഈദ് നൈറ്റ് ജനപങ്കാളിത്തം കൊണ്ട് ശ്രദ്ധേയമായി. ഇന്ത്യൻ ക്ലബ് ഗ്രൗണ്ടിൽ നടന്ന പരിപാടിയിൽ ആയിരക്കണക്കിന് ആളുകൾ ആർപ്പുവിളികളോടെ എതിരേറ്റു.
പെരുന്നാൾദിനം വൈകീട്ട് 6.30നു തുടങ്ങിയ ആഘോഷ പരിപാടികൾ രാത്രി വൈകിയാണ് അവസാനിച്ചത്. ഒപ്പനയും ഡാൻസും ഒപ്പം പ്രശസ്ത ഗായകരായ സലീം കോടത്തൂർ, നിസാം തളിപ്പറമ്പ്, റിഷാദ് തലശ്ശേരി എന്നിവരുടെ നേതൃത്വത്തിൽ നടന്ന സംഗീത നിശയുമായിരുന്നു പ്രധാന പരിപാടികൾ.
കോൽക്കളിയും ഒപ്പനയും അടക്കമുള്ള കലാരൂപങ്ങൾ ജനഹൃദയങ്ങളെ കീഴടക്കി. ഗസൽ ബഹ്റൈൻ മുട്ടിപ്പാട്ട്, ടീം മെഹന്തി ഒപ്പന, ടീം മഞ്ചാടി ഡാൻസ്, മണിപ്പൂരി ഡാൻസ് അടക്കം മറ്റു പരിപാടികളും ഉണ്ടായിരുന്നു. ഈദ് തലേന്ന് ബി.കെ.എസ്.എഫ് മെഹന്തി രാവും പരിപാടിക്ക് മുന്നോടിയായി നടത്തിയിരുന്നു.
ഈദ് നൈറ്റിൽ ഇന്ത്യൻ എംബസി സെക്കൻഡ് സെക്രട്ടറി ഇജാസ് അസ്‍ലം, ക്യാപിറ്റൽ ഗവർണറേറ്റ് ഇൻഫർമേഷൻ മേധാവി യാക്കൂബ് ലോറി, പ്രമുഖ വ്യവസായി പമ്പാവാസൻ നായർ, മുഹമ്മദ് ഫാസിൽ തുടങ്ങിയവർ വിശിഷ്ടാതിഥിയായിരുന്നു. ഉദ്ഘാടന ചടങ്ങിൽ കൺവീനർ ഹാരിസ് പഴയങ്ങാടി സ്വാഗതം ആശംസിച്ചു.
ചടങ്ങിൽ വിവിധ സ്പോൺസർമാർക്കുള്ള ഉപഹാര സമർപ്പണം അതിഥികൾ നിർവഹിച്ചു. ബി.കെ.എസ്.എഫ് ഭാരവാഹികളായ ബഷീർ അമ്പലായി, സുബൈർ കണ്ണൂർ, നജീബ് കടലായി, സ്വാഗതസംഘം ഭാരവാഹികളായ ഫ്രാൻസിസ് കൈതാരത്ത്, അനസ് റഹിം, ജ്യോതിഷ് പണിക്കർ, മജീദ് തണൽ തുടങ്ങിയവർ സന്നിഹിതരായിരുന്നു, പരിപാടിക്ക് കാസിം പാടത്തകയിൽ, ലത്തീഫ് മരക്കാട്ട്, ഫസൽ ഹഖ്, അൻവർ കണ്ണൂർ, മണിക്കുട്ടൻ, മനോജ്‌ വടകര, ഷീജു, സലാം മമ്പാട്ട് മൂല, നൗഷാദ് പുനൂർ, നുബിൻ അൻസാരി, സലിം, അൻവർ ശൂരനാട്, അജി പി. ജോയ് തുടങ്ങിയവർ നേതൃത്വം നൽകി.
