മനാമ: സമസ്ത കേരള സുന്നി വിദ്യാഭ്യാസ ബോര്‍ഡ് അംഗീകാരത്തോടെ ബഹ്‌റൈനില്‍ പ്രവര്‍ത്തിക്കുന്ന മജ്മഉ തഅലീമില്‍ ഖുര്‍ആന്‍ മദ്‌റസകളിലെ 5, 7, 10 ക്ലാസുകളിലേക്കുള്ള പൊതുപരീക്ഷ ഏപ്രില്‍ 5, 6 (ശനി, ഞായര്‍) തീയതികളില്‍ നടക്കും.
മുഹറഖ്, മനാമ, സല്‍മാബാദ് എന്നിവിടങ്ങളിലാണ് പരീക്ഷാ കേന്ദ്രങ്ങള്‍ സജ്ജീകരിച്ചിട്ടുളളത്. ബഹ്‌റൈനിലെ വിവിധ ഭാഗങ്ങളില്‍ പ്രവര്‍ത്തിക്കുന്ന 13 മദ്രസ്സകളില്‍ നിന്നായി 164 വിദ്യാര്‍ത്ഥികളാണ് ഇത്തവണ പൊതുപരീക്ഷ എഴുതുന്നത്. ഐ.സി.എഫ് മോറല്‍ എജ്യുക്കേഷന്‍ ഡിപ്പാര്‍ട്ട്‌മെന്റിന്റെയും റൈഞ്ച് സുന്നി ജംഇയ്യത്തുല്‍ മുഅല്ലിമിനിന്റെയും നേതൃത്വത്തില്‍ പരീക്ഷക്കായുളള ഒരുക്കങ്ങള്‍ പൂര്‍ത്തീകരിച്ചതായി ഭാരവാഹികള്‍ അറിയിച്ചു.
കെ.സി സൈനുദ്ധീന്‍ സഖാഫി, അബ്ദുല്‍ ഹകിം സഖാഫി കിനാലൂര്‍, ശിഹാബുദ്ധീന്‍ സി ജീവി, ഷംസുദ്ധീന്‍ സുഹ്രി, നസീഫ് അല്‍ ഹസനി, മന്‍സൂര്‍ അഹ്‌സനി, അബ്ദു റഹീം സഖാഫി അത്തിപ്പറ്റ, മജീദ് സഅദി എന്നിവരെ സൂപ്പര്‍വൈസര്‍മാരായി നിയോഗിച്ചു. എസ്.ജെ.എം, ഐ.സി.എഫ് നേതാക്കള്‍ പരീക്ഷാ കേന്ദ്രങ്ങള്‍ സന്ദര്‍ശിച്ച് ഒരുക്കങ്ങള്‍ വിലയിരുത്തി.
