മനാമ: ബഹ്റൈൻ ഇന്റർനാഷണൽ എയർഷോയുടെ (BIAS) എട്ടാമത് എഡിഷൻ 2028 നവംബർ 15 മുതൽ 17 വരെയുള്ള തീയതികളിലേക്ക് മാറ്റി. ഈ വർഷം നവംബർ 18 മുതൽ 20 വരെ നടത്താനിരുന്ന പ്രദർശനമാണ് 2028-ലേക്ക് പുനഃക്രമീകരിച്ചത്.
ലോകത്തിന്റെ വിവിധ ഭാഗങ്ങളിൽ നിന്നുള്ള അന്താരാഷ്ട്ര പ്രതിനിധികൾ, പങ്കാളികൾ, വ്യോമയാന മേഖലയിലെ പ്രമുഖ സ്ഥാപനങ്ങൾ എന്നിവരുടെ പങ്കാളിത്തം കൂടുതൽ ഉറപ്പുവരുത്തുന്നതിനാണ് പുതിയ തീയതികൾ പ്രഖ്യാപിച്ചതെന്ന് സുപ്രീം ഓർഗനൈസിംഗ് കമ്മിറ്റി വ്യക്തമാക്കി. എയർഷോ നൽകുന്ന അന്താരാഷ്ട്ര ബിസിനസ്സ് അവസരങ്ങൾ പൂർണ്ണമായി വിനിയോഗിക്കാൻ പുതിയ തീയതികൾ സഹായകരമാകുമെന്നാണ് സംഘാടകരുടെ വിലയിരുത്തൽ.
വ്യോമയാന മേഖലയിലെ മുൻനിര കമ്പനികളെയും അന്താരാഷ്ട്ര പങ്കാളികളെയും ഏകോപിപ്പിച്ചുകൊണ്ട് എട്ടാമത് എഡിഷനായുള്ള ഒരുക്കങ്ങൾ പുരോഗമിക്കുകയാണ്. ആഗോളതലത്തിൽ തന്ത്രപ്രധാനമായ നയതന്ത്ര-വ്യാപാരാവസരങ്ങൾ സൃഷ്ടിക്കുന്നതിൽ ബഹ്റൈൻ എയർഷോയ്ക്കുള്ള പങ്കും, ആഗോള ഇവന്റ് ഡെസ്റ്റിനേഷൻ എന്ന നിലയിൽ രാജ്യത്തിന്റെ സ്ഥാനവും കൂടുതൽ ശക്തിപ്പെടുത്താൻ ഈ നീക്കം ഉപകരിക്കുമെന്ന് സമിതി കൂട്ടിച്ചേർത്തു.
2010-ൽ ആരംഭിച്ച ബഹ്റൈൻ ഇന്റർനാഷണൽ എയർഷോ, ഇന്ന് ലോക വ്യോമയാന രംഗത്തെ ഏറ്റവും ശ്രദ്ധേയമായ അന്താരാഷ്ട്ര പ്രദർശനങ്ങളിലൊന്നാണ്.
